Hadien wa chah kem ar ngut ki dkhot ka KSU South Khasi Hills District yow takit yeiwa jia ha Ichamati heiwa da em ar ngut ki Dkhar wa chah tynyap haka 27 tarik u bnai wa dep, neiliang Ribok Diengdoh, President ka KSU South Khasi Hills District Unit da maham u wow lai toor cha ka Sohra Police Station mynstep ka sngi.
Yeini da ong u neidaw i rukom wan kem ki pulit ya ki dkhot deiwa lai rah ya kini ki ar ngut na yung ki heipor pyrdi synyaaw lakam ki toh ki Terrorist.
Da ong u wa lada emkaam u takit toh u phah da ka kot yow wan ki cha thanat, wei nachwa leh kut wa jia, da Phone cha oo yow wan u cha thanat tangwa kiwa ha-yung u da pyntip ki wa ya oo leh wan thooh hi ki pulit heipor 1:30 i ynne i step synyaaw tangwa oo em u cha Shillong wei ymtoh wa rieh u.
Chooh chooh da e daw u wa mar ya kem ya kini da khana yei pyrtuid ki cha kiwa thoh khubor katwa kitu won kiwa emkti wow tynyap ya u Lurshai hadooh katni ym em wa pynbna pyrtuid.
Da ong u leh wa ki Phone Number ki waroh ym em tympleh wei ileh ym em wa pyntip cha ki nadooh itu i por wei ini i rukom leh toh lakam wow pynhiar tput.
Kamtæ da ong u wa mynstep daw poi u hapoh 12:00 waje pyrdi sngi ha Sohra Police Station wei da khut u leh ya ki bei ki pa, ki khynroo khyllood wa chah yooh beiñ neipor cheipor wow mih ki chakhmat.
Da kyntait u leh wa emkti ki hei wow pynyap bru wei ymtoh wow pynngat Case ya kini ki khon khynroo neibhah daw ktah ko ya ka mynried khlem da biang ki sabut wa tikna wa emkti ki ha ini i kaam.
Da ong u leh wa daw ya pait ha kiyi ki kyndon wa chah pynngat ki wei lada ym em ki sakhi, neiliang ka seiñ leh tip hi ko kammon u leh ya kiwa thombor.
Da khana u leh wa la soo snem da lai booh syntu ki ya u Lurshai wei mar ya dep ki yei kaam mih wot ki wei kattæ won kammon u poi chei kaam pynyap bru, kamtæ da maham u ya ki pulit wow sangeh yei kem ya ki dkhot ka seiñ.
Discussion about this post