Shillong: Ka Hynñiewtrep National Youth Front (HNYF) Nartiang Circle da pynbaad ko wa u MDC ka Barato-Mukroh Constituency, u Rio Sten da soi tooh u ya ki pyrtuid yong kiwa toh u yoh myntoi na ka MDC Scheme.
Hawa yaklam wa kiwa pathai khubor ynne ka sngi u President ka HNYF Nartiang Circle, u HW Sutong da ong u wa heiyatoh wa ini ka seiñ da rai ko wow lai ujor (FIR) pyrchah ya uni u MDC mynstep ka 18 tarik.
Da ong u wa em du kattu katni ngut na kawi ka chnong wa haap hapoh kani ka Constituency kiwa da yoh myntoi na kani ka Scheme MDC, tangwa kiwi kiwa da mih pyrtuid ym em yoh ki iyi iyi leh.
“Em boon tylli ki Scheme wa da pynlait tangwa hadooh katni ympu em kawon kawon ka roi ka paar hapoh Constituency,” da ong u.
Da ong chooh chooh u wa kini ki Scheme MDC kynthup ki ya i saam tin yung CGI Sheet wa kiwi kiwi wei da kyntu u leh ya ki bor ka aiñ wow chimkhia hajrong ini.
Neiliang ka F. Dhar, kawa man kawi na ki manbei ka wym em yoh myntoi na kani ka scheme hanlada mih pyrtuid ko (kam kawa yoh myntoi ha ka list) da pynsñiaw ko yei diaw mynsien neibhah wa da pynemkaam yei pyrtuid ko katwa yoh myntoi cha kiwi.
Discussion about this post