Maham ujor u khynroo pyrchah ya ka MeECL neibynta ki chnong ka Elaka Narpuh wym biang i rukom pynpoi bordiñ

Jowai: Kiwa boon ki chnong hapoh ka Narpuh Elaka, East Jaiñtia Hills kiwa em tymbud u sarokbah NH-44 kiwa kynthup ya ka Thangskai, Umstain, Tongseng, Sonapyrdi, Lum Myrli, Chymplong, Kuliang, Pyrtakuna, Umkiang, Lymphyllut, Lum Soski, wa kiwi kiwi ha kini ki snem wa da dep wa hadooh katni tkhoh bha i rukom sam bordiñ ka MeECL ya ki.

Boon na kini ki chnong sah ki hei doom i langoh dei yong tayaw wei hadooh dei yong bnai wei lada slap namo em la-ær kajiak hi-eh leh chah ah ka bordiñ na Lumshnong iwa ktah joor ya ki paidbah kani ka thaiñ, da ong u khynroo Kynjaimon Amse.

Da ong u leh wa katni i bordiñ katni poi i du 3 namo 4 kynta chi sngi wei manda dooh u yoh biang hadien dei yong sngi wei ini i rukom leh ka MeECL man i pyrchah ya ka hok samen yong uwi pa uwi wa em ha kini ki chnong.

Chooh chooh da ong u wa ha ki thaw sor lada dooh bordiñ dei miet i synyaw leh ka MEeCL phah bru bait ko wow chna ya iwa sih tangwa i leh ko ya ki chnong wa em cha jngai cha palatchnong man i i wym ye u pdiang wei man i leh iwa pyrchah yei hok ki paidbah.

Related posts

Lai kjat ki waheh wa ki khynnah na Dkhiah West chadooh cha u mot u Kiang Nangbah

March 23, 2024

Pynphooh ka Loompyrdi Iongpiah ya ka sngi ki kynthai deiwa pdiang burom ya ka Ridamaya

March 8, 2024

Heijooh i por da ong u wa hanlada dooh bordiñ dei yong tayaw wa yong bnai iwa phylla dooh toh wa ka bai bordiñ hi poi ko man u bnai wei lada kyntait wow su, chah daiñ kuna ki wei iwa yoo danda wa poi ka bai bordiñ khlem em won kiwa kreh ka MeECL kiwa wan pait ya u meter, iwa pynyoo wa da antaad hi-eh ya ka bai bordiñ ki manyung ki bru.

“Kini ki thaw toh kiwa slah oor khyndaw iwa yoh u sakhi yei pat ki chrot light heiwa ye u dooh ka bordiñ tangwa lada ym em slap namo la-ær leh i rukom saam bordiñ leh dang thut hi i” da ong u Kynjaimon.

Da pynrap u leh wa i leh ka MeECL ktah i ym du ya ki paidbah tangwa khamtam ya ki khynnah kiwa man ka mynried yong ka ri wa ka jaitbru.

Uni u khynroo da dep e dorkhat u leh cha u Deputy Commissioner ka East Jaiñtia Hills, u MS Lhuid, hei yatoh wa ini wei neiliang u Lhuid da kular u leh wow chimkhia yeini neiliang yong oo wei kani ka dorkhat da phah cha u Chief Secretary wa u SDO ka MeECL, Khliehriat.

Da maham u leh wow ujor pyrchah ya ka MeECL lada ym mano ko yeini katkam ki kyndon ka Consumer Protection Act 1986.