Ka JAC kawa kynthup ya ka Jaiñtia Hills Truck Owner Association, Jaiñtia Hills Clinkers and Cement Association wa ka Meghalaya Truckers Union da lai yachem ko ya Deputy Commissioner ka East Jaiñtia Hills District ha ka 20 tarik uni u bnai chirup wa ka dorkhat.
Ha ka dorkhat da dawa wow pynkrehkaam ya ka dor bai kit kawa da pynmih da ka sorkar jylla ha ka Naikhynde 2020 lyngba ka Notification NO.TPT.91/80/813.
Ha kani ka hukum, da pynthymme noh ko ya i dor bai kit mar ki truck itæ T.7 hadooh T.11 chi kilometre chi ton ha ki sarok psiang, T.8 hadooh T. 12 chi ton chi kilometre ha ki sarok moo wei T. 10 hadooh T. 12 chi ton chi kilometre ha ki sarok khyndaw.
Neiliang u DC da kular u ya ka JAC wow phah ya ki karkhana khyndaw-bilat (Cement Factory) wow bood ki ya ka rai ka sorkar katkam ka tai ka Notification lyngba ka Central Motor Vehicles Act 1988 Section 67 kawa da e bor ya ka sorkar jylla u booh ya i dor bai kit hapoh ka jylla.
Ka seiñ da kyntu joor ko leh ya ka sorkar wow phah ya ki karkhana wow bood ya kani ka rai lym kamtæ ka seiñ daw sdang ko ya ka yakhih kawa khlem sangeh nadooh ka 31 tarik uni u bnai.
