Ka Joint Action Forum (JAF) ya kawa da chna ha ka 11 tarik uni u bnai ha chnong Umsatai, EJHD chirup wa ki paidbah da maham yakhih ko wow pyrchah ya ka karkhana Coke Industry ya kawa dang chna hapyrdi ki soo chnong wa em hapoh Elaka Rymbai.
Neiliang u Chairman ka Forum, u Shnalad Rymbai da ong u wa i daw wa pyrchah ya kani ka karkhana toh neidaw wa daw ktah ko ya ka rymaw hapoh ka District.
Da ong u leh wa ymye u kyntait wa em boon tylli ki karkhana hapoh ka District wei ini toh neidaw wa ymem u pyrkhat jngai ki bru waheh deiwa e ya ki NOC khamtam ka District Council khlem pyrkhat de yei chah ktah ka rymaw ha kini ki karkhana.
Chooh chooh da ong wa ki paidbah ka District ym em yoh ki yei hok yong ki wot du 20% i e bhah ha kini ki karkhana neibynta yong ki, kamtæ da rai wow pyrchah bait ya kiwon kiwon ki karkhana wow sdang ki ha kani ka District.
Kam wow pynkynmoo heini, ya kani ka karkhana da sdang u chna ya ka ha Wah Deiñling kawa em hapyrdi ki soo chnong wa kynthup ya ka Umsatai, Deinsatlang, Ladwahwapung wa ka Pynurkba, East Jaiñtia Hills.
