Jowai : Ka Jowai District Tuberculosis Office ynne ka sngi da kynmoo warom ko ya ka World Tuberculosis Day deilang waroh ka pyrthai heiwa ha uni u snem da pynman hajrong ka phang “United to end TB.”
Hei step ynne ka sngi da pynman chwa da ka lai paidbah wa da wan chimbynta ki khynnah skur deilang kiwa kreh ka ophis TB heiwa da lai kjat ki nadooh na madan Marian Hill Higher Secondary School hadooh ha District Library, Jowai.
Ki khynnah leh da rah ki ya ki Placard kiwa thoh ya kiwa boon ki phang hei yatoh wow yada na ka TB kamjooh wow pynwiar jait noh ka.
Ha ka yalang wa pynman ha District Library Auditorium wa da pyllai da u Dr. M. Talang, DM&HO ka West Jaiñtia Hills District, da yoh yei klam pynche cha ki paidbah chaphang ka kjut TB na u Dr. F.A. Lamin, Medical & Health Officer ka Pamra Paithlu PHC.
Hei klam yong oo da ong u wa 15 Lak ngut ki bru yap ki man u snem na i kjut TB ha ka pyrthai, wei man ka sngi ha India 5,000 ngut ki bru da yoh ki yeini i kjut.
Ha ka pyrthai man ka sngi da yap chi hajar ngut chi sngi wei kiwa boon dooh toh ki bru wa yoh kjut TB ha pyrthai toh ha ka ri India.
Ka Dr. E.B.V Laloo ka District Tuberculosis Officer, Jaiñtia Hills hei klam yong ka da ong ko wa ka kjut TB toh kawa poor na uwi u bru cha uwi lyngba i ka-oh uwa em TB, i hær ki mynthu kamtæ emkaam wow tymmoh yei ktein heipor wa ka-oh wa synrieh yow lait ini i kjut u poor.
Wei ya ki bru wa suba wa em kjut TB ki, ki dak ki chin man ki kamni; em i ka-oh wa neh pyllat ya ar tayaw, i iñ doh wym wiar de, mih chit heipor wa thiah, prai da i snam wa kiwi kiwi.
Da pyntip ko leh yow suk u chem ya kiwa kjut TB ka sorkar da e ko da ka kor CBNNAT ha kawi pa kawi ka District wei lyngba yong ka yei u yoh ya ka result hapoh 2 kynta don hi.
Heijooh i por leh da ong wa kiwa yoh kjut TB lada ym biang i dih dawai ki u khniang wa pynman ya ka kjut TB daw ye u wow leh pyrchah ya ki dawai kjut TB, kamtæ da sdang da ka sumaar DOTS ka wow haap kiwa kjut u dih dawai ha khmat ki Nurse.
Ha kani ka sngi da pynbna leh ya kiwa jop ya ka Slogan Competition heiwa da yoh nyngkong ka H.K. Singh Memorial School, wa ar ka Government Girls’ Higher Secondary School katwa yei wa le da jop ka Marian Hills Higher Secondary School.
Da saam leh ya ki khusnaam cha ka Sahmin Lyngdoh, ka ANM na ka Nongtalang CHC kam ka dak wow tipmit yei kreh chitom wow e dawai TB wa ya ka Larimon Khlem ka Staff Nurse na ka Pamra Paithlu, PHC kiwa kreh chitom yei jooh i kaam.
Kiwi kiwa klam ha kani ka sngi toh u DC ka WJH u R. Rapthap uwa man kam u kongsan wa ka Dr. J.N Shullai, Director MCSWA.
Discussion about this post