Jowai: Ka chnong Nongkhroh kawa man ka chnong wa haap hapoh Thadlaskein Block, West Jaintia Hills District, hapoh i yahkhmat yong ka Seng Samla Nongkhroh dei ya krehlang wa ka FARM, Northeast (JHDS) da pynman ki ya ka pynkhooid ya ka chnong ka thaw.
Hadien wa da seiñ ya ka Children and Youth Group Nongkhroh yong ki khynnah wa ki khynroo khyllood na ki san tylli ki dong wa em hapoh ka chnong Nongkhroh da sdang ya ka kaam pynkhooid ha waroh ki dong wei da rai wow leh ya ini man ka Sngi Choh that.
U Jimmy R. Kharmuti, Programme Coordinator, FARM, Northeast da ong u wa man ko kawa sniawsuk wow pait yei clur ki khynnah khian wow mih chakhmat wow wanrah ya ka khooid ka suba hapoh ka chnong ka thaw, ha i jooh i por e u ka yaroh wa khroo ya u President ka Seng Samla u Aibor Diengdoh wa u Secretary chnong u Kyrmern Rynjah kiwa da chim khia wow pynchlur ya ki khynnah wow wanrah ya ka khooid ka suba hapoh chnong.
Neiliang u Rimigius Pyngrope, Cluster Coordinator yong ka FARM, Northeast da ong u wa man ko kawa emkaam wow pynchlur ya waroh nadooh wa dang khian yow myllien ki ya ki kaam wa bha ha ka imlang sahlang kamtæ ngait skem u wa ini wa sdang katni daw wanrah ko ye kylla hapoh chnong ka wa ka roi ka par ya waroh kawi ka chnong hi.
Wow pynkhroo ya kani ka sngi pynkhooid chnong, hei step da pynman ya ka phet Marathon kawa ya chim bynta da ki spah ngut ki khynnah khian wa khynroo wei hadien ini da pynman ya ka pynkhooid chnong waroh kawi.
Neiliang ki bei ki pa ka chnong Nongkhroh dap ki dei kmen wa i sarong wow yoo yei kylla hapoh ka chnong hadien wa dep pynkhooid wei da kular ki leh wow yarap lang ya ki khon yong ki yow ye kani ka kaam u lai chooh chooh cha khmat.
Discussion about this post