Man ka sngi sah ki kari ha u sarok Amlarem-Dawki neidaw wa kit palat pood ki truck

Jowai: Kiwa lai luti na u sarok Amlarem-Dawki (NH-40E) da ood ki yei joor i sah kut ki kari man ka sngi, step wa miet neidaw wa boon ware ki truck wa kit moochuni.

Ki paidbah wa haap maad yeini da ong ki wa ki truck da lai ki ar laiñ kiwa hiar wa kiwa ku kiwa kit 9 Ton kamjooh kiwa kit palat pood.

Ynnin i miet sah kut le kynta ha Sohkha ynne i step leh kamjooh le kynta wei da ktah joor ko ya ki paidbah kiwa lai kreh cha Amlarem, Dawki, Sohkha wa kiwa lai thooh dawai na Nongtalang CHC.

Ka I. Laloo ka SDO ka Amlarem Sub-Division da pyntip ko wa i daw wa joor ini i sah ki kari toh wa em ki truck kiwa kit palat ya 9 Tonne wei ya kini ki truck da phah liwan ki yow li noh ki ya iwa kit tam ki hadien wa dep thaw yei khia yong ki. Da phah liwan ya ki toh neidaw wa da dap ki thaw wa em ha ka Weighbridge wow noh yeiwa kit palat pood kamtæ haap lai noh ki cha ki thaw wa tih ya u moo.

Related posts

Lai kjat ki waheh wa ki khynnah na Dkhiah West chadooh cha u mot u Kiang Nangbah

March 23, 2024

Pynphooh ka Loompyrdi Iongpiah ya ka sngi ki kynthai deiwa pdiang burom ya ka Ridamaya

March 8, 2024

Ka Laloo da pyntip ko leh wa da dep pyntip cha kiwa challan moo wym hoi u kit ki palatpood tangwa dang em bait kiwa leh pyrchah yeini.

Kamwa man kattæ ka sarok toh ka One Way tangwa neidaw wa haap uiñ kini ki truck wa kit palat pood da wanrah ko ya i chitom ya ki paidbah, wei ya kiwa kit palat pood u pynchitom ya ki katkam ka aiñ neibhah ym em burom ki ya ka hukum da ong chooh chooh ka Laloo.

Da ong ko leh wa da dep phah pulit ko yow pyntikna wa lai bait i lai i wan ki kari.

Ynne ka sngi won ka Laloo da thoh ko cha ka ki seiñ challan moo, ki tre truck kamjooh cha u Secretary ka Meghalaya International Exporters Chambers of Commerce, Dawki deiwa pyntip cha ki wa ha ka 5 wa ka 6 tarik uni u bnai da joor i sahkut kari khamtam ha ki bynta ka chnong Sohkha deiwa ong wa ki truck da lai ki ar tylli ki laiñ, ki truck wa kit palatpood kiwa toh u liwan neh ki ha rood sarok wei em leh ki wym em wa yah kari. Da pynkynmoo ko leh kani ka kit 9 Tonne toh ka hukum ka NGT, da khang leh wow chim pass ki truck wa kiwi kiwi de ki kyndon wei lada chem wa em ka tynkheiñ yeini, waroh ki seiñ haap bah khlieh ki yeini wei daw pynchitom ya ki katkam ka aiñ.