Shillong: U Montri ka tnat rep ka riang ka jylla, u Banteidor Lyngdoh da ong u wa ka sorkar jylla dadep e ko i thaw iwa 200 Acre cha ka sorkar India neibynta u chna ya ka Central Agriculture University (CAU) ha Ri-Bhoi ha ka 4 Kmaichonglad (Dec) 2014.
Yeini da ong u hawa jubab yeiwa kylli u MLA ka Mawphlang u Syntar Klas Sunn yei thied thaw neibynta wow chna ya ka CAU, neiliang u montri da pyntip u wa da mang poisa T 35 klur neibynta wow chna ya ka CAU ha ka jylla wei i kreh man i iwa lai bait chaaid chaaid.
U Lyngdoh da pyntip u wa i thaw wa 200 acre ha Kyrdem Kukai, Ri-Bhoi, da thied na ka kur Kharsati hei dor T. 5,49, 66,000 (san klur, soophaw khynde lak, ynru phaw ynru hajar tanka).
U montri da pyntip u wa i thaw na ka tnat MeECL iwa heh 40 acre, ka sorkar ympu em yoh ko na ka.
Heijooh i por u Montri Rangbah, u Conrad K Sangma hawa pynrap ya i jubab u montri, da ong wa ka sorkar pyrdi da dep wow pyllait ya ka poisa wa T. 30 klur neibynta wow chna ya kani ka skurbah.
U Conrad da pyntip u leh wa katni i kreh ha kani ka skurbah da lai i chakhmat wei i sikai ya ki khynnah da sdang i ha i thaw wa chipor.
Discussion about this post