U Deputy Speaker ka jylla, u Timothy Shira da ujor u da ka mukotduma (Defamation Case) pyrchah ya ki ar ngut kiwa pynpoor ya ka khubor thok pyrchah ya oo hadien wa klam u hapoh ka yung dorbar hajrong ka phang wow booh Winter Capital ha Tura.
Ya kani ka Case da e pyrchah ya ka Mikkanchi R Sangma kawa na Darangiri, Goalpara District, Assam wa u Balsrang Marak uwa na Thapa Darenchi, North Garo Hills wei yeini da leh ha ka yung bichaar u Chief Judicial Magistrate, Shillong.
U Deputy Speaker da ong u wa kini ki ar ngut da pynpoor ki ha YouTube yeiwa klam u hapoh ka yung dorbar hawa yatai wow pynman ya ka Tura kam ka Winter Capital wei kini ki bru khlem da tip chaphang iyi klam u, da pynbaad ki wa man u pyrchah ya ki jaitbru Garo wei man u pyrchah yei wanrah ya Winter Capital ha Tura.
Da pyntip u leh wa da e ar tylli ki Case kawi toh kawa pyndooh burom yei pyrtuid u wei kawi won toh i pynkylla yeiwa da klam da ong u dei thmu wow ktah yei kyrdan wei pyrtuid u.
Da ong u wa lada ym ye kini ki bru wow pynsakhiat yeiwa ong ki, toh u pynchitom ki katkam ka aiñ wei da paan leh mar Rs. 100 klur na kini neibhah wa da yahbakla ki yeiwa klam u hapoh ka yung dorbar.
Chooh chooh da ong u wa kawi na kini kawa na Assam ka wym emyatoh wa ka Meghalaya leh da yaleh ko wow pynsñiawthooh bakla yeiwa da klam u iwa da ktah yei pyrtuid i burom u hakhmat ki paidbah ka Constituency u wei na ini i daw da lai booh ya kini ki mukotduma.
Discussion about this post