U Montri Rangbah ka jylla, u Conrad K Sangma ynne da ong u wa lyngba i em ki bru wa seiñ khih daw ye u pynemkaam hok ya iwa em hapoh ka jylla waroh kawi, wei ya ini da ong u ha ka yalang pynkupburom namo ka Graduation Ceremony ya ka Tura PRIME Cohort-1 Entrepreneurs wa i pdiang ya ki kynhun wa ar namo ka Cohort-2 Entrepreneurs, ya kiwa da chah jied ha ka CM’s E-Championship ha ka yalang wa pynman ha Tree House Tura.
Neiliang u Conrad da ong u wa lyngba ka E-Championship, ka sorkar da ye ko wow yahluti ya ki khynroo kiwa angnood wow seiñ khih.
Da ong u leh wa ha ki ar snem wa dadep ka sorkar jylla da ye ko u thooh ya i sap wa em ha ki khynroo khyllood deiwa pynchlur ya ki wow seiñ khih ki.
Chooh chooh da ong u wa da sdang ya ka E-Championship Challenge toh wow booh ya ka rynsan ya kiwa seiñ kreh kiwa thrang wow seiñ khih wei lyngba kani ka programme, da ye u jied ya kiwa em i buit wow seiñ khih yow ye sakhiat ki u myntoi hadien habood.
Ha kani ka sngi da em leh ar ngut kiwa seiñ khih na Assam kiwa da khana ya ka parom wa ka luti wa lai ki ya kiwa kynthup ya u Bhanu Pratap na ka Northeast Farm Sales Promotion wa u Ranjith Baruah na ka Aromica Tea.
Ki khynroo na ka CM’s E-Championship 2020 Cohort-1 da e khublei ki ya ka sorkar wa da kyrchaan ko ya ki wei kani ka Programme ka sorkar daw yarap ko leh ya kiwa boon kiwa kwah u seiñ khih.
Ha kani ka sngi hawa pynpsiah ya ka kynhun wa ar namo ka Cohort-2 kiwa seiñ khih, da e T. 1 lak cha ki 25 ngut kiwa em hakhmat dooh wa T. 50,000 cha ki 25 ngut kiwa bood.
