Ka Chutwakhu Social Welfare Local Dorbar, Jowai kam i dak sñiawngooh yei chakri ki arngut ki ASHA hapoh ka chnong ka thaw, khamtam hadien i wan ka khlam COVID-19 ha ka District waka jylla hi waroh kawi, ynne ka sngi da e-kti ko daka song poisa wa mar T. 15,000 tam haka yalang wa tbian wa pynman hapoh yung krehkaam ka chnong kawa pynlai da u waheh chnong u P. Lyngdoh deiwa emlang leh chirup ki dkhot ka Executive Committee yong ka Dorbar Chnong.
Ki arngut ki ASHA yong ka Chutwakhu kynthup ki ya ka Almora Lytan waka Elisa Pakem.
U B.G. Ladia kam uwi u bru rangbah ka chnong uwa da embynta bait hapoh ka Executive Committee, hawa e-kti yaka song poisa cha ki ASHA, da e haroh u ki kyntien kyrkhu kyrdoh ya ki yow nang ye chooh chooh ki u chakri yaka chnong ka thaw, wa wot hapyrdi i yoh yei su wa khian leh, dei mon sñiawbha yong ki smat ki wow chakri iwa da man i kyrkhu wa khroo yaka chnong ka thaw.
Katkam i pyntip u waheh chnong u P. Lyngdoh, da ong u wa ya kani ka song poisa wada e-kti cha ki ASHA toh kawa da e sñiawbha daki khon yong ka chnong hi kam i dak i sñiawngooh yei kaam wei kreh chitom yong ki.
Chwa ini, da yoh leh i ngooh Blai na u S.D. Blah.
