Ka Umiam Eagles da jop ko da 6 Wicket ya ka Simsang Sharks ha ka yalehke wa ar ka Senior Men Challengers Cup One Day wa pynman da ka Meghalaya Cricket Association ha Shillong ynne ka sngi.
U Captain ka Umiam Eagles, u Raj Biswa da jop u ya ka kylla khlem wei da phah u ya u Captain ka Simsang u Akash Kumar wow Bat nyngkong. Ka Simsang ym ye kow wow Bat waroh ki Over deiwa kamai 133 na ki 40.1 Over deiwa dooh lut ki Wicket heiwa ka Eagles da ye ko wow kdong ya ini ha ka 24.1 Over.
Kiwa kamai boon dooh ya ki Sharks toh u Amiangshu Sen (28) wa u Wallambok Nongkhlaw (21) wei da em leh kiwi ki 6 ngut kiwa da yoh palat 10 Run.
Da ka bol, u Biswa da yoh u 3/27, u Elchiang Ch Momin 2/8 wa u Aditya Singhania 2/13.
Na kiwa Bat ka Umiam, u Biswa wa u Bamanbha Shangpliang da kamai lang ki 87 Run neibynta ka Wicket wa nyngkong heiwa u Biswa da dat u 3 tylli ki 6 Run wa 4 tylli ki 4 Run yow yoh 49 na 40 bol, katwa u Shangpliang leh da kamai u 49 Not Out na ki 69 bol wa kynthup ya 6 tylli ki 4 Run.
Hadien wa haap u Biswa, da bood sa 3 ngut heiwa u Shaisngi Lyngdoh da yoh u 2/25, tangwa ka Eagles ym em thut i kdong Run ko heiwa u Shangpliang da neh u hadooh wa kut.
Ka Simsang Sharks daw yakhun biang ko mynstep wei daw yachem ko waka Myntdu Lion heipor 9:00 waje i step.
