Ka lympung yalehbol ka 6th Meghalaya Games 2025 wa pynman ha Kiang Nangbah Stadium, Jowai, ynne ka sngi dapoi ko cha ka yakhun Final yong ki kynthai Women Senior wa yong ki chynrang Under-17.
Ha ka yakhun Final yong ki kynthai, ka East Khasi Hills District da yoh rah ko yei naam jop deiwa pynrem da 1-0 ya ka Ri-Bhoi District, lyngba ka kool wa thap ka Iaraplang Nongrum haka minit wa 35+5.
Neitæ ha ka yakhun Final yong ki chynrang won, ka Ri-Bhoi District da jop ko deiwa pynrem da 1-0 ya ka West Khasi Hills District lyngba ka kool wa thap u Newbirthson Sankli haka minit wa 8.
Hadien wa kut ki yakhun Final, da saam leh ya ki Prize cha kiwa jop da u Montri ka chnat Sports and Youth Affairs, u Shakliar Warjri hei emlang u Cliff Nongrum, Vice President ka MFA, u John Kharshiïng, President ka MSOA, ki dkhot ka WJDSA wa kiwi kiwi.
Najrong wa saam khusnaam cha ki liang wa jop wa kiwa rem, da saam leh yaka khusnaam Best Athlete ki kynthai wa da yoh da ka Sanfida Nongrum na East Khasi Hills, Best Athlete na ki chynrang won da yoh u Defender Sylliang uwa na Ri-Bhoi District.
Haka yakhun Third Place wa da pynman ynne hi ka sngi, hei yong ki kynthai da jop ka South West Khasi Hills District ya ka West Jaiñtia Hills District da 1-0.
Hei yong ki chynrang won da jop ka West Jaiñtia Hills District ya ka South West Khasi Hills da 7-2.
Discussion about this post