Ka yakob yah Cycle da pynman ya ka hei seiñ nyngkong ha ka Meghalaya Games ha ki khloo ka Malki ynne ka sngi deiwa chimkhia ka Meghalaya Cycling Association heiwa da pynman ya ki yakob neibynta ki Junior Boys waka Women’s Cross Country deilagn waka Downhill Hardtail.
Ha Crinoline Swimming Pool da pynman ya ki yakob yimpa deiwa pyndep le tylli ki Final wa jop da ka Alyzza M Lyngdoh kawa na East Khasi Hills ha ka Women’s 100m Freestyle deiwa pyndep hei por wa 1 minit, 29.35 second iwa da tam da chiteiñ minit ya kawa yoh wa ar. U Khrawkupar Lyngdoh ka South West Khasi Hills da yoh nyngkong u ha ka Men’s 200m Breaststroke (3:20.87) wei da jop u leh ya ka Men’s 200m Freestyle Final (2:48.41).
Ha ka cher soom namo ka Javelin, u Bonabenshor Syiemlieh da yoh takma ksiar u ya ka West Khasi Hills ha ka U-16 Boys’ deiwa cher 40.32 Metre. Ka East Garo Hills da yoh ko ya ka takma rupa wa takma tama lyngba u Nokkim Momin wa u Salchira R Sangma.
Ha ka U-18 Girls’ Javelin, ka North Garo Hills da yoh ko yei takam ksiar wa takma rupa lyngba ka Senitha G Momin (24.57m) wa ka Silanchi M Sangma katwa ka Walrimchi R Marak da yoh ki ya ka takma tama neibynta ka South Garo Hills.
Ha ka Women’s 10,000m, ka Kyntimon Marwein na South West Khasi Hills da yoh ko ya ka takma ksiar deiwa phet 41 minit, 59.64 second. Da jop ko ya ka Darishisha Iangjuh (East Khasi Hills) waka Bandasharai Marwein (SWKH).
Ha kani ka jooh ka kyrdan yong ki chynrang da jop da u Hepstarli Lyngkhoi (SWKH) deiwa phet 33:06.62, wa ar da yoh u Kresstarjune Pathaw (WKH) wa le u Belin Dkhar (West Jaintia Hills).
Ha ka Weightlifting kawa man leh ka sien nyngkong wa pynman ya ka, da saam 7 tylli ki takma ksiar wa jop da ka Ibanrihun Maring (55Kg Women), ka Ibalaiohkhamtilut Nawsaw (64Kg Women), u Banteilang Marwein (55Kg Men), u Maxcarelius Ryndongsngi (61Kg Men), u Anas Ryndongsngi (67Kg Men), u Edilbert Ryndongsngi (90Kg Men) wa u Donald Rymbai (110Kg Men).
Ha ka Tennis da pynthut u slap heiwa da hap wow pteiñ hei janmiet ha ka Clay Court ha Shillong Club.
Ha ka U-16 Boys’ Quarterfinals, u Harsh Singhania da jop u ya u Amit Ram da a Tiebreaker 9-8, katwa u Enrick Suchiang da jop u ya u Ryan Kharkongor 9-0. U Ishan Rawat wa u Rakshit Bajaj da jop ki da ka Walkover. Ha ka Men’s Singles, u Sanjeev Chettri da jop u ya u Enrick Suchiang 9-2, u Macdonald Thabah da jop u da 9-4 ya u Feniedee Rymmai, u Keane Marbaniang da jop u da 9-5 ya u Keane Marbaniang, u Joplut Kharbuli da jop u da 9-6 ya Wankhraw W Nongrum.
Ha ka Basketball, ka West Khasi Hills daw yachem ko yaka East Khasi Hills haka Women’s Final heipor 3:00 waje i sngi mynstep ha NEIGRIHMS Indoor Stadium, katwa ka Ri-Bhoi daw yachem ko waka EKH ha ka Men’s Final heipor 4:30 i janmiet.
Ka Ri-Bhoi da jop ko ya ka 2020 Champion ka West Khasi Hills ha ka Men’s Semifinal da 53-33. Ki chynrang ka EKH da jop ki ya ka West Jaiñtia Hills da 71-45, hachwa ini, ki kynthai ka EKH da jop ki da 70-12 ya ki kynthai ka WJH. Ha kawi won ka Semifinal ki kynthai, ka WKH da jop ko ya ka Ri-Bhoi da 63-22.
Ha ka yalehbol won, ka EKH da jop ko ya ka South West Garo Hills da 8-0 ha ka Quarterfinal ki kynthai ha Mawlai Madan Heh. Ka WKH da jop ko ya ka Ri-Bhoi da 2-0 katwa ka West Garo Hills da jop ko ya ka Eastern West Khasi Hills da 1-0.
Ha ki chynrang won wa da pynman ha madan ka SAI, ka Ri-Bhoi da jop ko da 5-1 yaka SWKH, katwa ka WJH da jop ko ya ka East Garo Hills da 3-0. Ka East Jaintia Hills won da jop ko da ka yachut Tie-Breaker (5-4) ya ka North Garo Hills hadien wa ka yalehke da kut ko da 1-1 hadooh wa kut i por.
Kiwi de ki yalehke wa da pynman ynne ka sngi toh ka Karate wa Table Tennis ha SAI Indoor Training Centre. Da pynbna leh wa u World Cup, Asian Champion wa World Champion Archer, u Atanu Das, daw wan u yow pait ya ka sngi khaddooh ka yakob siat khnam ha SAI mynstep ka sngi.
