Ki 2677 ngut kiwa chimbynta ha ki 19 tylli ki jait yalehke ha ka Meghalaya Games 2022 kawa da wai pyrda ynne, tangwa da em ki yalehke kiwa da sdang nadooh ynnin leh kam ka Gymnastics waka Basketball heiwa ki District wow psiah cha ka Semifinal ha ka Basketball da pynbait ynne wei daw pyndep waroh soo tylli mynstep ha NEIGRIHMS Indoor Stadium.
Da em leh kiwa boon tylli ki yalehke kiwa da yoh u sdang ynne ka sngi kiwa kynthup ya ka Football, Boxing, Taekwondo, Weightlifting, Badminton, Tennis, Shooting wa Archery.
Ka West Khasi Hills kiwa man kam ki Defending Champion ha waroh ki chynrang wa kynthai da psiah ki cha ka Basketball Semifinal. Ki kynthai daw yachem ki waka Ri-Bhoi heipor 12:15 i sngi katwa ki chynrang leh daw yachem ki waka Ri-Bhoi hi heipor 2:45 i sngi. Ka West Jaintia Hills waka East Khasi Hills daw yachem ki ha ka Semifinal ki chynrang wa kynthai heiwa ki kynthai daw pynman heipor 1:30 i sngi katwa ki chynrang won heipor 4:00 waje i janmiet.
Ha ka yalehbol won kiwa da pynman ha Mawlai Madan Heh wa ha SAI Centre, ka West Khasi Hills da jop ko yaka South West Khasi Hills, ka Eastern West Khasi Hills da jop ko ya ka West Jaintia Hills ha ki yalehke Pre-Quarterfinals kiwa man ki yalehke yong ki kynthai heiwa waroh ar da kut ki da 2-0.
Ha ka yalehke wa pynman ha Madan Heh da pynman leh ya ka Quarterfinal hapyrdi ka East Jaiñtia Hills waka North Garo Hills, heiwa ka East Jaiñtia da jop ko da 7-0 lyngba ki Hat-Trick da ka Rushia Dkhar (33′, 50′, 58′).
Ha ki yalehke ki chynrang, ka East Khasi Hills da jop ko da 13-1 yaka South Garo Hills haka Pre-Quarters wei kani toh ka U-21 yong ki chynrang wa ki Senior neibynta ki kynthai.
Ha Madanrting wa pynman ya ka Wushu, u Dorian Dean Nongrum da yoh takma ksiar u haka Sub-Junior Boys Below 42kg Category, katwa u Femi Rymbai da yoh u haka Sub-Junior Boys Below-36kg Category wa ka Marvisha Sohklet haka Sub-Junior Girls haka Below-42kg. Da wan wow sakhi da u Deputy Chief Whip, u Pyniaid Sing Syiem kam u kongsan heini.
Ha ka SAI Indoor Training Hall, da saam ya ki takma neibynta ki Gymnastics da u Working President ka Meghalaya State Olympic Association u John F Kharshiing, ka Vice-President, ka Matsiewdor War Nongbri wa kiwi de.
Mynstep daw sdang leh ki yalehke ka Athletics, Cycling, Karate, Swimming wa Table Tennis.
