Kiwa yalehke ka West Jaiñtia Hills ha ka Athletics da tyrchaaiñ ki ynne kawa man leh ka sngi wa ar yong ka yalehke Athletics haka lympung ka Meghalaya Games kawa da pynman ha Pa Togan Nengminza Athletic Stadium, Tura.
Hadooh wa kut ynne ka sngi, kiwa yalehke ka West Jaiñtia Hills da yoh ki wow khur yei jop ha ki soo tylli ki yalehke yow yoh Takma Ksiar na ki phra tylli ki jait yalehke wei da bood da ka Ri-Bhoi kawa da jop ar tylli ki Takma Ksiar katwa ka South West waka East Khasi da yoh ki mar kawi ka Takma Ksiar.
Ki kattu katni ki naam jop wa da yoh kiwa yalehke ka West Jaiñtia Hills toh lyngba ka 5000M ki chynrang heiwa u Dabit Dkhar da ye u wow pyndep yaka thong ha ka 15:53:9, katwa neiliang ki kynthai ha kani ka jooh ka yakob yaka Takma ka Ksiar wa Rupa da khur da ki arngut ki kiwa yalehke ka SWKHD lyngba ka Lyntijingkyrmen K Jahrin kawa da pyndep yaka thong ha ka 19:55:2 waka Marqueenless Ramsiej 20:03:2, katwa yaka Takma Tama da yoh da ka Happiness Phawa ka West Jaiñtia Hills.
Ha ka High Jump ki khynnah kynthai, ka Takma Ksiar da khur yaka da ka kynthai ka Ri-Bhoi, ka Joytiful Narlong kawa da ye u kynthih hadooh 4.56 Meter, ka Takma Rupa wa Tama da lai cha ka Savinity Jyndiang na WKH waka Shidalin Rongpih ka Ri-Bhoi.
Ha ka yakob phet 400M ki chynrang, u Kyrshanlang Shylla ka West Jaiñtia Hills da yoh u yaka Takma Ksiar hadein wa ye u pyndep yaka thong ha ka 50:3s, katwa u Donbok Shabong ka EKH wa u Kalbin Marak ka EGH da yoh ki yaka Takma Rupa wa Tama.
Katwa ha ka yakob phet wa 400M ki kynthai, ka Retina Hanse da yoh ko wow khur yaka Takma Ksiar hadien wa da ye wow pyndep yaka thong haka 1:01:5, ka Takma Rupa wa Tama da lai cha ka Damika Lyngdoh na WJH waka Albamery Sohsang na WKH.
U Renaldi Dkhar da pteiñ u wow pynlang takma deiwa yoh sa kawi ka Takma Ksiar haka Long Jump ki chynrang hadien wa da ye u kynthiar hadooh 6.34M.
Iwa jop wa pynkmen dooh ya kiwa yalehke ka West Jaiñtia Hills da wan hadien wa jop yaka 4x100M Relay ki chynrang heiwa da ye ki wow pyndep yaka thong ha ka 45.3, heiwa heini u Renaldi da ye u wow yah biang ya ka liang yong oo chei jop katwa yaka Takma Rupa wa Tama da yoh da ka EKH wa WGH.
Katwa ha ka 4x100M ki kynthai, ka EKH kawa emlang ka Anjelina Jackson da yoh ki yaka Takma Ksiar wei da bood ka Ri-Bhoi hei wa ar katwa ka WJH hei wa le.
Discussion about this post