Ka Rangdajied United FC da jop suk ko da 6-0 ya ka Sein Pynbhalang ha ka yalehke ka Group B ka Meghalaya State League 2023 kawa da pynman ha Kiang Nangbah Stadium, Jowai ynne ka sngi.
Ha ka Group A ha Shillong hapyrdi ka Jyntru FC waka Umrit SC da kut da 1-1 katwa ha ka Group D ha Tura, ka Selsella Sports Association da jop ko da 3-1 ya ka Warima Youth Club ha madan Chandmari.
Ka Rangdajied da em ko ka thong wow thap boon kool neibhah wa hapoh ka Group B kiwa yoh nyngkong ye u rai da ka Goal Difference tangwa da pynsepai ko ya ar tylli ki Penalty wei da tam ko da 1-0 hadien wa da kut le pawa ka yalehke.
Tangwa hadien wa sah sa kamwa 30 minit ka yalehke, sdang ki laad wow wai deiwa yoh Hat-Trick u Tremiki Lamurong (63′, 76′, 77′), ar kool na u Banshanbha Khongsdam (19′, 75′) wa ka chi kool da u Wanlamsuk Nongkhlaw (90’+2). Da ini, ka Rangdajied da pyntam ko ya ka Ladthadlaboh SC kawa da jop ya ka Sein Pynbhalang da 5-0 ha ka 13 tarik.
Mynstep daw pynman ya ki yalehke ha waroh soo tylli ki thaw kiwa man kamni:
Group A, Shillong- Mawlai SC Vs Langsning FC, 3 PM
Group B, Jowai – Niaw Wasa United Vs Mulait United, 2:30 PM
Group C, Mawkyrwat- Riangdo YSCA Vs Seven United, 3:00 PM
Group D, Tura – Wasa FC Vs Atong Matgrik FC, 3:00 PM
