Hadien wa ka Shillong Lajong da booh ko yei thaw yong ka ha ka Quarter Final ka Meghalaya State League (MSL) 2024, ynne won ka Mawlai SC wa ka Ladthadlaboh SC leh da yoh ki yei thaw yong ki deiwa yoh yei jop ha ki yalehke.
Ka Mawlai da jop ko da 10-0 ya ka Patharkhmah ha ka Group F ha Shillong. Katwa ka Ladthadlaboh da jop ko da 3-0 pyrchah ya ka Seven United ha ka Group C wa pynman ha Tyrsad.
Ka Mawlai ynne da pynlehke ko da kiwa dang khian kyrdan tangwa da jop suk ko ya ka Patharkhmah da ki kool wa thap u Samlang Rympei (45′, 45’+1, 50′, 84′) deiwa thap lang u Balviky Marngar (22′, 26′), u Arkibor Makhroh (23′), u Romarius Laban (25′), u Mewanshan S Nongkseh (51′) wa u Mark Gareth D Shabong (81′). Ka Mawlai kattu da yoh ko 9 Point na le tylli ki yalehke.
Ka yalehke hapyrdi ka Ladthadlaboh wa ka Seven United da man ko leh kawa jem chiliang heiwa ya ka Ladthadlaboh da thap da u Sanki Langstang (38′), u Banteilang Shylla (40′) wa u Lammida-O Dkhar (90’+2). Ka Ladthadlaboh leh kattu da yoh ko 9 Point na ki le tylli ki yalehke.
Ka Khliehmawlieh won da jop ko ya ka Sutnga ha ka Group B da 1-0 da ka kool wa thap u Wallambok Shangpliang (87′) ha Mawkyrwat. Ka Sutnga da jop chwa ko la ar sien wei kattu waroh ar, ka Sutnga wa Khliehmawlieh da em ki mar 6 Point wei ye leh u yoh i jooh sa ka Mawten lada jop ko ya ka Riangdo Youth.
Ha ka Group D wa da pynman ha Khliehriat, ka Rangdajied United da jop ko da 8-0 ya ka Iatyllilang Lumsehkot Raliang da ki kool wa thap u Pasborlang Khonglikong (21′, 89′), u RT Hanson Pdang (37′), u Balamlynti Khongjee (45′), u Owanijuh Pajuh (58′), u Freddy Banteilang Jyrwa (64′), u Manbhakupar Iawphniaw (74′) wa u Aenam G Jyrwa (78′). Ka Rangdajied kattu da yoh ko 7 Point wei daw hap ko wow yang ya ka yalehke hapyrdi ka Rymbai Skhenshynriah (4 Point) waka Mulait United (1 Point) yow tip yi wow yoh nyngkong ha kani ka Group.
Heiwa khaddooh, ka 7 Wasa United da yoh ko yei jop deiwa pynrem ya ka Seinbhalang Shkentalang da 2-0 ha Group E ka Wahiajer kiwa thap da u Jeff K Rymbai (20′) wa u Bannangsan Dkhar (65′). Waroh kini ki ar liang ym em laad de ki wow lai chakhmat.
Mynstep daw em kawi donhi ka yalehke katæ hapoh ka Group C hapyrdi ka Nangkiew Shaphrang Lumdiengngan wa Mawlum Tyrsad.
Ka Result ynne ka sngi:
Group A (Tura): Lumsohkhlur 2 – 0 Atong Matgrik
Group B (Mawkyrwat): Khliehmawlieh 1 – 0 Sutnga
Group C (Tyrsad): Ladthadlaboh 3 – 0 Seven United
Group D (Khliehriat): Rangdajied United 8 – 0 Iatyllilang Lumsehkot Raliang
Group E (Wahiajer): 7 Wasa United 2 – 0 Seinbhalang Shkentalang
Group F (Shillong): Patharkhmah 0 – 10 Mawlai
Discussion about this post