Ka Seven United da jop ko ya ka yalehke wa khaddooh ki Group Stage ka Meghalaya State League 2024, deiwa pynrem ya ka Nangkiew Shaphrang Lumdiengngan da 2-1 ha Tyrsad ynnin.
Kini ki ar liang da yoh ki mar 3 Point na ar tylli ki yalehke tangwa ka Lumdiengngan da tam ko deiwa kheiñ ya ka Goal Difference (0 la -2) chwa kani ka yalehke ka Group C.
Ka Lumdiengngan da pyntam nyngkong ko da ka kool wa thap u Kitboklang Sohtun (22′) chwa wa u K. Sammuel Kurbah (41′) da su kylliang u ya ka Seven United wei da ye ko wow pynjop ha ka minit wa 77 lyngba u Kenny Syiemiong.
Da ini, ka Seven United da yoh wa ar ko ha ka Group C hadien ka Ladthadlaboh kawa em hei nyngkong.
Ka Ladthadlaboh da yoh ko 6 Point deiwa jop ya waroh le tylli ki yalehke katwa ka Seven United da yoh wa ar ko deiwa yoh 6 Point deiwa rem chisien.
Heiyatoh wa ka Group B, neiliang Meghalaya Football Association (MFA) daw pynche ko myntu neidaw wa em le tylli ki Team wa yoh mar 6 Point kamjooh daw pynbna leh mynnu u sdang ki yalehke Quarter Final.
Ka MFA ini wa dep da rai ko wow pynsangeh chwa ki yalehke kam chibynta wow pynkreh ya ka National Football Championship kawa tip kam ka Santosh Trophy 2024-25, kawa daw pynman ha uni u bnai.
Discussion about this post