Ka Ksang Bnai kawa dei chah tymmoh u Bnai waroh uwi hei syrngu ka Pyrthai namo ka Total Lunar Eclipse da pynkmen ko chiboon ya kiwa yoh u sakhi yeini ynne i janmiet heiwa ha Jowai da mih u Bnai heipor kamwa 5:00 waje i janmiet kat heipor wa dang tymmoh wot u Bnai waroh uwi.
Nyngkong da artatien u yoh u sakhi yeini i Ksang Bnai neidaw wa em lyoh uwa da kneiñ ya u bnai tangwa manda rah u lyoh wei da sep lut ka sngi da yoh u chynna yei Ksang Bnai wa miat bha ha kani ka kynti heiwa ka suiñ bneiñ man ko kawa khooid khlem em lyoh de.
Kani ka Ksang Bnai kawa man leh ka Total Eclipse daw jia biang sa chisien hadooh u snem 2025.
Ki kattu katni kiwa da ya sakhi lang yeini i Ksang Bnai ha Jowai da pynsñiaw ki yei mynsien wa kmen wa yoh ki wow sakhi yeini heiwa da yooulti bha ki yeini tangwa da rap dooh mynsien ki hadien wa slem u Bnai u mih wei manda mih u leh em u lyoh wa kah, tangwa mar ya wiar u lyoh da yoh ki wow yoo yei tyrchaaiñ u bnai sa du kajiak donhi iwa mut wa da sdang randien i syrngu i pyrthai tangwa da sihbhah wym yoh u yoo yei chah tymmoh u Bnai waroh uwi neidaw wa em u lyoh.
Hanla kattæ leh da ong ki da man ka sngi wa sahkynmoo.
Ki dur wa chon toh na Khliehchnong, Jowai.
