Ka A’chik Conscious Holistically Integrated Krima (ACHIK) da thoh ko cha u Montri Rangbah ka jylla, u Conrad Sangma wow pynman ya ka Tura kam ka nongbah tlang namo ka Winter Capital deiwa ong wa ini toh i angnood ki paidbah da slem nadooh wa yoh ya ka jylla.
Ha ka chihti, ka seiñ da ong ko wa ini daw pyntikna ko wa da yooh salonsar ya ki kaam pynroi yow pynku ya ki paidbah ka Meghalaya waroh kawi hi.
Da ong leh wa deiwa yoh nongbah sa kawi daw pynduna ko yei hap pynlut por wow lai cha Shillong na ri-loom Garo.
Da dawa leh wow rah ya ka Additional Secretariat, Additional Secretary wa Additional DGP cha Tura yow smat u pyndep yei krehkaam, yow pynku ya ka ri-loom Garo, yow pynjan leh cha ki paidbah yei synchaar khadar iwa emkaam wow yoh ha ka synchaar paidbah wei daw yabhah leh yei bor yow yoh ki paidbah yei synchaar wa bha wa miat.
Chooh chooh da ong wa i por tlang ha Tura ym em da kjam ware ki wei man ko ka thaw wa biang wow yoh ya ka Winter Capital.
Da e daw leh wa deiwa em kani ka nangbah tlang daw e laad ko ya kiwa na ri-loom Khasi wa Jaiñtia wow wan ki leh cha Garo yow wanrah yei ya sñiawthooh uwi ya uwi yow ye u ya imlang dei suk.
Da e nongmuna leh wa kiwi ki jylla em ki boon tylli ki nongbah kam ka Andhra Pradesh kawa em 3 tylli, ka Himachal Pradesh, Jammu & Kashmir, Karnataka wa Maharashtra kiwa em mar ar tylli. Wei ini da yarap bha ko wow wanrah yei synchaar wa bha deiwa pyrkhat yeiwa emkaam kiwa boon ki jaitbru khlem da leh chilliang, kamtæ ka Tura leh da toh u yoh ko u man noh kam ka Winter Capital.
