I ya kynaad hapyrdi ka Assam wa ka Mizoram da sdang biang i hadien wa ki pulit ka Assam deiwa yahkhma u DC ka Hailakandi wa u SP da lai ki cha u pood ki ar jylla heiwa da tympra ki ya ki thaw wa da thung da rep da ki Mizo ha ka yurim wa ini da rep pyrchah ya ka aiñ.
Neiliang won u SP ka Kolasib District, Mizoram u Vanlalfaka Ralte da ong u palat 100 ngut ki bru sorkar wa ki pulit ka Assam da yahkhmat da u Hailakandi District Deputy Commissioner wa u SP da psiah ki chapoh ka Mizoram wei da neh ki ha itai i thaw nadooh ka 27 tarik.
Ini i thaw wa tip da ki Mizo kam i Aitlanghnar (iwa man leh i thaw wa mih ka wah Aitlang), iwa neiliang ka Mizoram ong ki toh iwa em cha liang yong ki iwa jngai kamwa 5 km na chnong Vairengte wa em hapoh ka Kolasib District wa em pood lang wa ka Karimganj District, Assam.
U Ralte da ong u leh wa ki bru ka Vairengte da myllien ki wow thung wow rep ha ini i thaw nadooh ki por warim. Kamtæ da ong u wa ki bru sorkar wa ki pulit ka Assam da wan kam yabor ki ya ini i thaw.
“Ini toh i leh embor da ka Assam yow kam ya i thaw ka Mizoram hadooh wa ki warep da hap yut ki neidaw wa tieñ ki ya ki pulit wa kieñ tiar yaleh,” da ong u Ralte.
Neiliang ka Mizoram leh da phah bru ko cha ini i thaw wei hadien wa da pynman yei yaklam, waroh arliang ym bien ki wow kynrandien wei pynarliang da chongsah ki ha ini i thaw.
Ki le tylli ki District ka Mizoram kitæ ka Aizawl, Kolasib wa Mamit da em ki ya u pood wa jrong 164.6 Km wa ka Cachar, Karimganj wa Hailakandi District ka Assam.
I pyrchang wow pynbait pood hapyrdi ki ar jylla toh iwa da ya pyrchang nadooh u snem 1995 tangwa i wym poi cheiwon cheiwon.
Da poi i ya kyndaad wa joor ha u snem 2018, ynnin u snem ha u Naisaphra da mih biang i ya awri. Ha u Thohlakhmi (Feb) uni u snem leh da mih biang i ya awri iwa da hap ka sorkar pyrdi wow tuklar yow pynyasuk hadien wa khang ka Assam ya u sarok wa psiah cha Mizoram.
