Jowai: Ynne ka sngi da mih i awri wa joor bha ha sor Shillong hapyrdi ki Khasi wa ki bru wym tipmit hadien wa mih ka khubor wa chah dat uwi u khynroo ha ki bru ha Themmator namo kawa tip leh kam ka Punjabi Lane uwa kreh kam uwa bood (Conductor) ya ka wi ka bus rong soo kawa kamai na kani ka thaiñ hadooh wa mynsoo u wei da kit ya oo cha Civil Hospital Shillong wow yoh u yei sumaar.
Katkam ka yutip wa yoh da ong wa uni u khynroo u wympu tip pyrtuid, heipor wa sah blok ki kari da hiar u na ka bus wow pynlait kari wei heitæ i por em ki khynroo ha kani ka thaw dat ki oo ha kani ka thaw Themmator ya kawa tip leh kam ka Punjabi Lane.
Hadien wa jia ini kiwa yah ya ki kari kamai bus rong soo da pynyieñ ki ya ki kari kamai ki ha Thembijoi, iwa em hapyrdi ka laad na GS-Road (Laad Umsohsun) cha u sarokbah (Rhino Point) wei neini da mih ki wow lai cha Themmator wow dawa wow kem ya kiwa emkti wow pynmynsoo ya uni u khynroo.
Haitæ i por da em ki pulit kiwa da phah ya ki wow lai ki cha Motphran, wei mar ya poi ha Motphran da em ki paidbah wa yalang wa kynthup leh ya ki khynroo kiwa ye u man ki dkhot seiñbhalang kiwa da kyriaw wow lai biang cha i thaw wa chah dat uni u khynroo heiwa da wan ki bor ka District wei da joor i awri wa mih.
Wei da sdang lang ki paidbah heini wei da sdang wow beh ya ki paidbah wa yalang heitæ wei da sdang ki bor sorkar wow beh ya ki na kani ka thaw yeiwa da pynbood won sa i sdang pakhot moo ki khynroo cha ki bor sorkar ka District kamjooh leh ya ki pulit.
Manda yoo yeini neiliang ki bor pulit da sdang ki wow pakhot wei wow siat ya ki Tear Gas wow beh ya ki paidbah na kani ka thaw (Motphran).
Hadooh wa pynmih ya kani ka khubor ympu tip katwon ngut wa mynsoo wei iyi leh ki bor District hajrong wow pynduna yeini waroh. Neiliang yong u Wyrta daw pyntip chooh chooh i ya phi hajrong ini iwa jia.
Discussion about this post