Jowai: Ynne i step heipor kamwa 11:00 waje uwi u khynroo uwa na chnong Mulieh wa dang 24 snem uwa tip pyrtuid kam u Talbinus Dhar da chah dat u ha u tre dukan iwa tip kam i New Star Light wa em ha Laad Thomas Jones, Synod College, Jowai iwa dai Mobile Phone wa kiwi kiwi ki mar.
Ha ini i jia katkam wa pyntip ki pulit da ong wa uni u khynroo da psiah u hapoh dukan wei da sdang dih biri u wei neiliang u tre dukan da ong u ya oo wow mih cha lait katwa dang dih biri neidaw wym neh u chah yei sma tdem biri wei heitæ i por da sdang mih i awri iwa da poi cha i yachoh wei neiliang uni u tre dukan heini i por da chim u da ka plastic wa em tiar hapoh wei da dat u ya uni u khynroo uwa da takha na khlieh wei dalai u cha Jowai Police Station wow ujor yeiwa jia.
Hadien ini ki pulit da lai ki cha ini i thaw wei da kem ki ya u tre dukan, wei suki pa sukai manda poor ka khubor yeiwa da jia, da mih ki paidbah wa ki dkhot ki seiñbhalang kiwa da lai phah khang ya waroh ki dukan kiwa suba toh yong ki baar jylla kiwa em ha Iawmusiang wa ha ki tymbud ki sarok Newhill, Ladthadlaboh wa kiwi kiwi.
Kini ki paidbah wa chrai da hiar biang ki cha Iawmusiang wei da sdang ki wow yalang hajan ini i dukan wa jia ini wei neiliang ki bor District da wan leh u SP wa ki Magistrate kiwa beh ki ya waroh kiwa em ha kani ka thaw wei da pyntip ki leh wa da kem ya uni u bru wa dat oo u Talbunius wei u kset chwa ya oo 14 sngi.
Neiliang u SP ka West Jaiñtia, u Vivek Syiem da pyntip u wa uni u khynroo da takha u malum male na khlieh wei da dep phah sumaar ya oo wei da liwan noh u cha chnong.
Da kyntu u ya waroh wymhoi u ngait ki ya ki khubor thok ki khubor hamsaya wei wow man ki kiwa pynneh yei chongsuk hapoh chnong Jowai wa ka District waroh kawi.
Chooh chooh da pyntip wa uni uwa chah dat toh uwa jooh chah kem ha ki pulit ha ki kaam tooh wei yei pyrtuid uwa dat daw pynmih won hadien wa pyndep ya ka takit.
Discussion about this post