Heiyatoh wa iwa jia ha Narayanpur District ka jylla Chhattisgarh ynnin ka 2 tarik heiwa da chah tympra wei chah leh pynsih kawi ka yungmane ki Catholic, neiliang u Montri Rangbah ka jylla, u Conrad da beiñ u ya ini wa jia wei da kyntu u leh ya ki bor District wow pynchitom ki ya kiwa emkti ha ini.
Da phah u leh yei khubor pyn-ehnasib cha ki pulit kiwa da mynsoo ha ini yow smat ki wow chait.
Neiliang u Montri Rangbah warim ka jylla, u Dr. Mukul Sangma leh da beiñ u ya ini wa jia deiwa ong wa ym toh wow mylliñ yei khlanbor ka ri iwa mih nei mahajon hei ktien u thylliej, ki dustur riti kamjooh leh ka niam.
Neiliang won u Pastor Kyrsoi Pyrtuh da ong u wa ha kini ki kajiak sngi da em i chah ban beiñ ki Christan kiwa da chah dat khlem daw iwa da pynchong sier ya ki Balang Christan heiwa ini wadep da em ki bor sorkar ka Assam kiwa da paan yukheiñ hadooh katwon ngut kiwa da kylla Christan.
Kamtæ da ong u wa ini wa jia waroh ym toh iwa dang thymme i chah thombor ki khian paaid wei lada i kam ki Christan ha ka jylla Meghalaya pyrkhat i wa ini i chah thombor ki Christan ha kiwi ki jylla ym ktah ko ya i iyi iyi neibhah ym jia i ha ka jylla yong i, ini toh kawa bakla chiboon.
Da khut u leh ya waroh kiwa chong chnong ka jylla, ki seiñ saiñhima wow beiñ joor ya ini i chah thombor ki Christan wa kiwi de ki khian paaid ha ki jylla waphær ka ri India.
Puræ leh: Chah leh pynsih ka yungmane Catholic wa em ha Chhattisgarh
