Ini wa dep, ka sorkar jylla lyngba ka chnat Arts & Culture da rai ki wow pynyieñ da ki motdur wa chi rynyieñ yong ki le ngut ki khlawait ka jylla kitæ U Kiang Nangbah, U Syiem Tirot Singh wa u Pa Togan Sangma ha u mot sahnaam yong kini ki khlawait wa da em chwa ha pchem ka State Central Library, Shillong.
Hajrong ini neiliang uwa chong chnong ka Jowai, u Khroo L Pariat da thoh u cha u Montri ka chnat Arts & Culture, u Sanbor Shullai wow yaroh ya ini i thmu yong ka sorkar iwa da e kti ha ka Riti Academy wow tah wei wow pynwadur ya kini ki motdur.
Kamtæ neiliang u Pariat da kdaw u wa yei dur yong kini ki khlawait da yoo wa phær ki na iwi i thaw ha iwi iwa da pynkulmar ya ki paidbah kamjooh kiwa uiñke suwari wow yoo wa ha uwi u motdur da iwi i dur katwa ha uwi won da iwi i dur.
Heiyatoh wa ini, da kyrpaad ya ka sorkar wow pynbna syndon ko iwi dur wa toh yong kini ki khlawait yow suk leh u tipmit ya ki lada pynyieñ lane booh yei dur yong ki heiwon heiwon yow man leh i sarong yong i wow yoo yei dur yong ki la ha ki Stamp, ki kot ki sla wa puræ la ha ki skur næ ki skurbah.
Puræ leh: Daw pynyieñ da ki motdur wa chi rynyieñ ki khlawait ka jylla ha u mot wa em ha State Central Library
