U slap waka la’ær na ka æryong Cyclone Remal da joor bha u ha i miet ka 27 tarik wei da wanrah i ya i chlai um ha ki bynta waphær waphær ka West Jaiñtia Hills District la ha ki wah bah, ki liar wa ki chnong ki thaw.
Najrong i chlai um da em leh i haap i oor wei da chah ktah leh ki thaw rep, i oor khyndaw, i oor dieñ wa kiwi kiwi.
Ha Jowai hajrong i chlai ka Wah Myntdu, Syntu Ksiar da em leh i pat u dieñ ha ka kchaaid ha i bynta u sarok cha Syntu Ksiar iwa da kah ya ka luti chibet chipor, da em leh i pat u dieñ uwa da ban ya iwi i yung ha Khimusniang, Jowai wei neiliang ka chnat Civil Defence & Home Guards, Jowai hapoh i yahkhmat u B. Swer, District Home Guards Commandant wa u SI Yeowezer Challam da ye ki wow pam lyngkhot ya uni u dieñ wow lait nei maa.
Da wan sakhi leh ya ini i jia da ki sahep na ka District Disasters Management Authority, Jowai.
Neitæ da sakhi leh wa mih ki jhep ha u sarok ka Iawmusiang iwa boon toh i piah na ki sder booh dakha.
Ha Ummulong leh da em i chlai um wa rap heh.
Hanla em ini i jia wa haap wa oor ha kiwa boon ki thaw ka West Jaiñtia Hills tangwa hadooh wa pynmih ya kani ka Wyrta ym em iwon iwon i jia wa sñiawsih ya kiwon kiwon ki bru.
Chooh chooh i wan kani ka æryong da pynthut i ya i rukom saam bordiñ kamjooh i thut ki Mobile Network ha kylleiñ hadooh chiteiñ sngi haroh ynne ka sngi.
Discussion about this post