Katkam wa pynmih khubor ka Barak Bulletin, hadien wa ka KSU da wah ko ya ki ktein wa pyrchah yaki Bengali ha ki kattu katni ki thaw ha Shillong heiwa da em leh ki ktien wa ong wa waroh ki Bengali ha Meghalaya toh ki nong Bangladesh iwa da ktah yei sñiaw ki Bengali.
Ha Kamrimganj District ka Assam kam chibynta wow e jubab deiwa yahkhmat ki bru samen kiwa dang khynroo wa kynthup ya u Journalist uwa man leh kam u Social Worker u Sujan Deb Roy, da pynuiñ ki da ki ktien maya deiwa wah ya ki ktien wa ong wa waroh ki Khasi wa sah ha Asaam toh ki nong India ki payu para “Bengali-Khasi Bhai Bhai”.
U Roy da ong u wa ini i sñiaw ka KSU ym ye wow man i sñiaw yong ki Khasi waroh deiwa ong leh wa ka pyrthai leh man ko ka wi iwa kwah wow pynkynmoo ya waroh.
Da ong u wa sñiawsih u wow yoo ya ki ktien ka KSU wa ong wa ki Bengali wa em ha Meghalaya toh ki nong Bangladesh deiwa ban wa ki Bengali wa im ha Meghalaya da em ki nadooh warim, wei i thmu toh wow pyndooh yei sñiaw yaphær na ini wa jia, heiwa hawa kut waroh man i kam ki wi donhi.
Chooh chooh da ong u wa i jubab deiwa lait daw pynsih chooh chooh ko ya iwa man kattæ, kamtæ da kwah wow pynpoor yei man chi payu para.
