Ki pulit ka Rajasthan da kem ki ya ar ngut ki bru ha chnong Bharatpur kiwa yalap niam Christan deilang wa 8 ngut kiwi kiwa da chah pynbaad wa thmu ki wow pynkylla niam ya ki spah ngut ki Hindu deiwa phon wei pynbiej ki.
Kiwa chah kem toh u Kunwar Singh uwa na Bharatpur wa u Shailendra Singh uwa na Firozabad katwa kiwi won ki 8 ngut da pynngat ki hapoh ka Section 151 ka Code of Criminal Procedure wei da pynlait ki hadien wa yoh jamin ki wei ini toh iwa da jia haka 13 tarik uni u bnai.
Ki pulit dapoi ki heini i thaw heiwa da kam wa kini ki bru da pyrchang ki wow pynkylla niam ya 350 ngut ki Hindu deiwa phon ya ki da ka poisa heiwa da pyrchah ka seiñ Hindu ka Vishwa Hindu Parishad (VHP) heiwa u District President yong ka, u Lakhan Singh da ong u wa hei step ka 11 tarik da em kamwa 20 ngut kiwa yalap niam Christan da yachem ki ha Sonar Haveli Hostel yow pynbait pynman yaka yalang yow pynkylla niam ya kini ki 350 ngut ki Hindu.
Da pynbaad wa kini ki 20 ngut wa kynthup lang ya ki kynthai kiwa yalap niam da khana ki ya ki jaitbru ri-loom wa kiwa man kam ki Dalit wa u Jisu Christ daw pyndooh u ya waroh i eh i khoo ki wei deiwa kylla Christan ki daw wiar lut waroh iwa kjut wa chitom ki kamjooh i jinjar poisa.
I kynaad da sdang i hadien wa em ki ar ngut ki kynthai Hindu kiwa da chah khut wow wan cha kani ka yalang da sai ki ya ki Mobile Phone ki yow riñ Video ya kani ka yalang tangwa da chah knieh ki Mobile Phone ki ha kiwa yalap niam.
Ki dkhot ka VHP mar ya tip ki wa da pynman ya kani ka yalang dapoi ki ha ini i thaw heiwa da mih i yania heiwa da pynbaad wa ki Christan da klam beiñ ki ya ka niam Hindu kamjooh ki blai Hindu.
Da joor i ya awri awra manda paan kini ki kynthai ya ki Mobile Phone ki heiwa ha ini i por dapoi leh ki dkhot ka VHP deilang wa ki Bajrang Dal tangwa deiwa wan ki pulit da ye wow pynjai-jai deiwa kem ya kini ki chah pynbaad pynkylla niam.
Discussion about this post