Hadien wa ka Executive Committee yong ka Jaiñtia Hills Truck Owners Association (JHTOA) ha ka 15-11-25 da pynbna khut pynthymme biang ko ya ki kari hapoh ka seiñ JHTOA deiwa e por nadooh ka 17-11-25 hadooh ka 20-11-25, ynne ka sngi won chi kynhun ki tre trok wa embynta hapoh ka JHTOA da pynman yalang ki yow pynsñiaw i pyrchah joor hajrong ini i pynbna deiwa ong toh wa tbian ware i por, najrong wa chim rai du da ki kattu katni ngut khlem ka sur uwa boon walang lyngba ka General Meeting.
Kamtæ dawa ki wow pyndam chwa ya ini i pynbna hei wow pynbna da kawi tawon dei wow pynjrong yei por khnang wa ki tre kari u yoh ki u pyndep yei kaam.
U Balen Thubru uwi na ki tre trok ong u, i e por wa du kajiak sngi ye u em i thmu wa cha lyndet kiwa yahkhmat, neibhah da sñiawthooh che wa ki tre trok du hapoh kini ki tarik ym ye ki u pyndep.
Wei hajrong ini i pyrchah yong ki ong u wa dadep phah dei thoh ki cha kiwa yahkhmat ka JHTOA yow e por kyllooid ki, heiwa da e Copy haroh ki cha u DC.
Heijooh i por dawa haroh ki na u President ka JHTOA wow khut yaka General Meeting hapoh u bnai December uni u snem 2025 wei la jia ym khut u daw pna ya khut pynman yalang hi ki para tre trok kamwa yalang ki ynne ka sngi.
Chooh chooh u Balen Thubru ong u hawa em yalang ka JHTOA ym jooh em khutlang ko ya kiwa boon walang ki tre trok, heiwa da chong yalang da rai ki du para kattu katni ngut donhi, wei ya ka rai pynbna wow pynthymme biang ya ki kari hapoh ka JHTOA leh da rai du da ki 3-4 ngut najrong wa booh por wa tbian, heiwa ki President wa kiwa yahkhmat wa nachwa ym jooh leh ki kamni tangwa da e kyllooid ki yei por hadooh kamwa 2-3 bnai.
U Pynshngaiñ Papang won ong u, “Kwah i wa kawon kawon ka rai kawa toh neibynta uwa boon walang toh u rai leh daka General Meeting ym wow chim rai du da ki kattu katni ngut ki dkhot EC”.
Discussion about this post