Man ko kayi kayi ka khubor wym jooh rap sñiaw hadooh ynne waka JHADC kawa man ka bor wa hakhlieh dooh wa pait yei synchaar khadar wa yatoh waka aiñ Dolloi ka aiñ Waheh Chnong, u yoh kylla ya ka da ki kattu katni ngut ki bru deiwa chim yaka bor ha kti yaka aiñ waheh chnong kawa toh ka hok ka bynta yong ka JHADC heiwa kini da booh ki da ki kyndon yong ki hi kiwa tyngkhooh waka aiñ ka Council.
Ini da jia i ha chnong Sohmynting, West Jaiñtia Hills District heiwa u Lephing Pyrtuh kam u waheh chnong wada jop yei jied waheh chnong deiwa thap Vote pyrchah ya u Bravestar Phawa haka 13-09- 2019, chirup i sakhi ki bor ka JHADC wa u Dolloi ka Elaka Amwi, da leh pyrchah kylla u yaka Council wa ya kiwi won ki jait kur ha Sohmynting mar ya dep chah jied, itæ toh deiwa thoh sop sop haka Constitution ka Dorbar Chnong Sohmynting kawa da Register u ha yung krehkkam u Deputy Commissioner, Joint Registrar of Societies, WJH wa toh du kiwa man kur Pyrtuh wa ye u jied kamjooh wow man waheh chnong ha Sohmynting.
Yeini da chem hei thoh ha ka “Lamphrang yong ka Constitution” kamjooh leh haka “ Article VIII (A)” yong ka Constitution kawa da yoh lyngba ka RTI, wa da emktilang leh wow soi da u Ling Pyrtuh, u Mynjurlang Lyngdoh, u Ebormi S Langshiang, u Treyoo Phawa, u Early Suting wa u Spar Rasmut.
Napyrdi kini kiwa yahkhmat chnong toh kiwa da stat da tip, tangwa wym tip hajrong kayi ka yurim nood ki wow leh kamni, neibhah najrong wa man pyrchah ko yaka aiñ jied waheh chnong ka JHADC katkam ka aiñ “The Jaintia Hills Autonomous District (Establishment of Elaka and Village and Election, Appointment, Powers, Functions and Jurisdiction of Dolloi/Sirdar and Waheh Shnong) Act, 2015”, man pyrchah ko leh yaka riti synchaar yong ka ri India katkam ka Indian Constitution Article 15.
Heijooh i por wot ka Kur Pyrtuh Sohmynting leh haka Constitution yong ka wym em thoh ko iyi iyi wa toh du ka Kur Pytruh wa ye u jied kamjooh u man waheh chnong kamwa da kam da kini kiwa yahkhmat chnong.
I yukylli wa mih toh myntu haka chnong Sohmynting lada jop Election waheh chnong da kiwi won ki jait kur utæ leh u mih u chakhmat wow lai pynkylla biang wa du ka kur yong oo hi wa yoh u man waheh chnong?
Haka Constitution, da chem leh wa kini kiwa yahkhmat chnong kam haroh ki waka Sohmynting toh ka chnong yong ka Kur Pyrtuh lane ka Hima ka Kur Pyrtuh kawa em ya u pood u ang wa kynthup u Moospong, Mootari, Myngkoi Lum, Wahtyr-a, Lum Syntung, Madam Pynthor, Lum Syrpad, Wahlakyndang, Wah Ummuchai wa chilynter ka Wah Umngot (nadooh Wai Dum hadooh Chkah Wah Tyr-a), tangwa ini i thoh waroh man kiwa bakla, neibhah katkam ki kot ki sla wada Register ha District Council da toh hei pyrtuid ka Dorbar Chnong Sohmynting ymtoh haka Kur Pyrtuh.
Chooh chooh haka Constitution ka chnong da kam ki wa toh ka kur Pyrtuh wa pynlai yaka synchaar khadar ka chnong Sohmynting hadooh katni, heiwa kiwi won ki jait kur da ngait ki neibhah ka toh ka kur wa e thaw yaki paidbah wa chong chnong, tangwa ini leh man iwa bakla neibhah hei yong sakhiat wei katkam ki sabut toh ka chnong kawa jooh e thaw ya kiwa dooh ba duk hapoh ka chnong ka thaw.
“Hao sñiawthooh i wa emkaam hi yaka chnong wow chna yaka Constitution neibynta i myntoi hapoh ka chnong ka thaw, tangwa u pynpsiah won hapoh ka Constitution ya kiwa kam kini ki jait thoh wa ktah yaka longbru manbru man ka wym ye u pdiang”.
Kani toh katkam ka khubor na u Laribha Kyndait wa u Wailad Suting kiwa chong chnong ka Sohmynting, wei heiyatoh wa ini da pynsakhiat ki leh yaka Constitution yong ka Dorbar Chnong, ka Constitution yong ka Kur Pyrtuh Sohmynting wa ka dustabit e thaw daka chnong.
