Da ka jooh ka aiñ namo ka Uniform Civil Code (UCC) toh ka thong wa hakhmat bha yong ka Bharatiya Janata Party (BJP) nadooh u snem 1998 yeiwa da booh ha ka Election Manifesto ya ka UCC u pynkrehkaam lada wan ko hei bor.
Kayi katæ ka Uniform Civil Code? Ka Uniform Civil Code toh kawi namo ka jooh ka aiñ namo kawa kreh salonsar ha waroh kawi ka ri khlem kheiñ de ya ka niam næ ka jaitbru, la hei kaam chongkha (Marriage), i pynlait kurim (Divorce), i hiar pateiñ (Succession) wa i kam khon (Adoption).
Ka BJP katni em ko hei bor, wei katkam ka Article 44 yong ka riti synchaar ka ri India, da ebor ya kawon kawon ka sorkar wow pynkrehkaam ya ka Uniform Civil Code hadien wa da yoh i mynjur ha Parliament.
Hadien ki kaam wa boon wa ka sorkar wa yahkhmat da ka BJP da chim ko, nadooh i wanrah ya ka CAA wa kiwi, ha kani ka kynti ka BJP da kyruiñ ko cha ka UCC katkam wa klam u Montri ki kaam pohyung ka ri, u Amit Shah ha ka yalang yong ka BJP ha Bhopal, ha ka 22 Naitung uni u snem. U Amit Shah da pynsñiaw u leh wa ya ini i thmu daw sdang na Uttarakhand wei da pynpoor cha kiwi ki thaw ka ri.
Heiyatoh wa ka jylla Meghalaya kawa em jar jiar ki riti ki dustur, wa i ngait, kammon kani ka aiñ u ktah ko, wei lada ye wow lait na ka?
Hajrong ini, u muktiar ka Meghalaya High Court, u VGK Kynta da pynsñiaw u wa kiwa mihkhmat ka jylla, waroh ki 3 ngut ki MP toh u pynsñiaw ki yei pyrchah ha Parliament ya i thmu wow pynkrehkaam ya ka Uniform Civil Code.
Da ong u leh wa kawi na ki laad toh wow pynkylla noh ya ka Sixth Schedule deiwa pyndam noh ya ka Para 12 (a) yong ka Sixth Schedule, wow pynyieñ biang ya ka Sixth Schedule kamwa da saiñdur nawa sdang, neibhah ka Para 12 (a) pyntlot ko ya ki aiñ wa chna da ki District Council. Heiwa da ong chooh chooh u wa ka sorkar Meghalaya toh u mynjur ki da ka ‘Resolution’ hapoh ka yung Dorbar Chna Aiñ wow dawa pyndam noh ya ka Para 12 (a) na ka Sixth Schedule.
Ka Dr. Fenella L Nonglait kawa man ka muktiar ha ka Standing Counsel yong ka All India Christian Council da ong ko wa kani ka aiñ toh kawa khia bha, wei emkaam u phyllu yumut bha ya ka deiwa yaar.
Chooh chooh da ong ko wa ymtoh iwa bha wow pynkreh jhan ya kani ka aiñ, neibhah wa yatoh ko wa ki aiñ samen wa i ngait iwa ymye wow tuklar da ka sorkar.
Da ong ko leh wa ya kani ka aiñ ye wow pynkrehkaam ha kiwi ki thaw kiwa ym chah ktah næ em i bha, wei kam ka ri India, ka Uniform Civil Code toh kawa emkaam tangwa neibynta ka jylla Meghalaya ya kani ka aiñ toh du wow booh chwa ya ka charood.
Hadien ka khubor wa yatoh wa i pynbna ka BJP wow kyruiñ cha ka Uniform Civil Code, kiwa boon ki sorkar kiwi ki jylla, ki seiñ saiñpyrthai da pynsñiaw ki jar jiar i sñiaw heiwa da em kiwa kyrchaan wei em kiwa pyrchah hajrong kiwa boon ki yurim.
U Symbood Montri Rangbah, u Prestone Tynsong da pynsñiaw u wa ymtoh iwa suk, wei wow wanrah kajooh ka aiñ ye wow khai ka thma, neibhah wa ka ri India em ko jar jiar i rukom im yong ki jaitbru kiwa boon.
Da ong u wa hadooh katni ka sorkar jylla ympu yoh ko kawon kawon ka yutip hajrong ini i thmu tangwa ka sorkar næ ka NPP ym pdiang ko yeini.
