Shillong: Ka North East Forum for Indigenous People (NEFIP) da dawa pynkrehkaam ko ya ka United Nations Declaration on the Rights of Indigenous Peoples (UNDRIP) ha waroh ki jylla ka thaaiñ mihsngi wei ya kani ka rai da chim ha ka yalang wa nyngkong yong ka wada khut pynman da ka Confederation of Meghalaya Social Organisations (CoMSO) ha North Eastern Hill University (NEHU), Shillong.
Ha kani ka yalang da wan chimbynta da kamwa 90 ngut kiwa man ki dkhot yong ki seiñbhalang ka thaaiñ mihsngi wa kynthup ya ka Manipur People Against CAB (MANPAC) wa ka Joint Committee for Prevention of Illegal Immigrants (JCPI) na Nagaland.
“Daw yaphyllu yumut bha i hajrong ini wei daw kyntu i ya ka sorkar India wow pynkrehkaam ya ka UNDRIP wow yada ya ki khian paaid ka thaaiñ,” da ong u Convenor ka NEFIP u Ningthouja Lancha ynne ka sngi.
Ya ka UNDRIP kawa da soi leh da ka India klam ko yei hok samen kamjooh i hok yonglang yong ki tre ri namo ki jaitbru khian paaid na ki thaaiñ ri-loom kam i hok mantre, i rukom im wa kyrpang, ka niam, i puræ puthi wa kiwi kiwi. Klam ko leh ya ki hok wow pynkhlan yei rukom im kini ki jaitbru.
U Lancha da ong u leh wa ki jaitbru khian paaid em ki kamwa 1.8 klur na ki 5.2 klur ki bru ka thaaiñ wei kamwa 2 klur toh kiwa psiah tooh ki bru cha Assam wa 50 lak ha Tripura.
Da rai leh wow dawa ya ka Inner Line Permit (ILP), National Register of Population (NRC) wa kiwi ki aiñ kamwa emkaam ki jylla ka thaaiñ.
Ha iwi i liang u State Coordinator ka Nagaland u Theja Therieh da pyntip u wa ka NEFIP daw pyrchah bait ko ya ka Citizenship Amendment Bill (CAB).
“Lada ka sorkar India pynkrehkaam ko ya kani ka Bill pyrchah yei kwah ki paidbah ka thaaiñ, daw chim won ya ka rai yonglang hadien,” da ong u.
Hajrong i kwah ka BJP wow wanrah biang ya ka CAB lada chah jied biang ko, u Therieh da ong u wa daw phah ya ka dorkhat manda dep chna ya ka sorkar thymme ha Delhi.
Discussion about this post