Jowai : Kiwa chong chnong waphær waphær yong ka East Jaiñtia Hills District, khamtam kiwa im ha i rep i riang wei kiwa ri mrad da i wi i rai da yachem ki ha kani ka 16 u Naikhynde yow pynkha ya ka seiñ kawa tip pyrtuid kam ka East Jaiñtia Farmer & Supplier Association (EJFSA).
Ya kani ka seiñ da pynkup bor wei da tipmit da ka sorkar lyngba ka office yong u Joint Registrar of Society, East Jaiñtia Hills District, Khliehriat ha kani ka 12 tarik uni u bnai.
Ka yurim yong kani ka seiñ toh wow kyntu ya i yoh i kot wei wow yada ya ka bei rymaw neidaw wa da pyrkhat jngai ki dkhot ka seiñ neibhah pyn na katni da sdang i duna i mih ki mar rep, mar baam, ki mar dih, ki jhoor hadooh ki mrad wa ri nadooh ki masi hadooh ki dakha.
Wei katkam wa man katni ya waroh ki mar nadooh ki baam ki dih wan ki na baar ka jylla bait, kamtæ da pynkha ya kani ka seiñ.
Kamtæ lyngba kani ka seiñ kyrmen ko wow kreh wow e sikai cha ki manbei manpa wa kiwi kiwi wow sdang ki u chimkhia yei khih deiwa ri ya ki mrad.
Kiwa kitkaam kani ka seiñ kynthup ki ya u President u Monki Sana, Vice President, u P. Dkhar, u General Secretary u D. Siangshai, u Assistant Secretary u Resto Muksor, u Treasurer u Nobelman Shylla, ki dkhot u Bashaniahlang Siangshai, u Wadlad Dkhar, L. Rymbai, Baimi Sana, Meai Sana wa u Becarefull Muksor.
Discussion about this post