Jowai: Neibynta wow chakri yaka imlang sahlang ka ri wa ka jaitbru da mih sa kawi ka seiñ thymme ki manbei na ri loom Jaiñtia kawa da e pyrtuid ka Jaiñtia Women Awakening Movement (JWAM)
Kiwa seiñ wa kiwa kitkaam yong kani ka seiñ toh ka President ka Merry Sungoh, Vice President ka Aidaliris Dkhar, Genaral Secretary ka Nika Sana, Assistant Secretary ka Rihun Dkhar, Financial Secretary ka Rilis Dkhar, Oganising Secretary ka Ardakini Shylla deilang wa 7 ngut ki Executive Members wa 21 ngut ki dkhot.
I thmu yong kani ka seiñ toh yow wanrah ya i yatylli ya ryntih hapyrdi ki khon kynthai ka ri-loom Jaiñtia, wow yieñ yaleh neibynta i hok yong ki kynthai wei wow wanrah yaka roi ka paar wa ka chong suk chong saaiñ hapyrdi ki khon kynthai ka Bri U Ynñiawtrep.
Ka seiñ da beiñ joor ko yei chah lehbeiñ wei chah pynyap dusmon ka khynnah skur ha Sohkymphor deiwa dawa leh na ki bor ka aiñ wow pynchitom wei wow kem syndon ya ki damok wa emkti ha ini i kaam wei wow kset patok ya ki chi rta lane deiwa pasi ya ki.
