Ynne ka sngi ki chipai ka Indian Army da mih ki na nongbah New Delhi deiwa yah ya ki thuk-thuk wow lehkmen yei dap 23 snem wa jop ka ri ya ka thma Kargil ha ka 26 Naiynñiaw pyrchah ya ka Pakistan wei ini i lehkmen man i leh kam chibynta yong ka ‘Azadi Ka Amrit Mahotsav’.
Kini ki chipai wa yah thuk-thuk kiwa em 30 ngut da mih ki na nongbah New Delhi cha Kargil War Memorial ha Dras (Ladakh) ynne heiwa da kaweh ya ka lama sdang ya i lai luti da Lt. Gen. BS Raju, uwa man leh u Vice Chief of Army Staff na National War Memorial, New Delhi.
Ki chipai wa yah ya kini ki thuk-thuk daw lai luti ki lyngba ka jylla Haryana, Punjab, Jammu & Kashmir wa Ladakh chwa wow pynkut ha Kargil War Memorial, Dras ha ka 26 tarik uni u bnai kawa man ka sngi wa jop ya kani ka thma ya kawa da tip leh kam ka Kargil Vijay Diwas.
Ya kini ki chipai wa yah thuk-thuk daw phiah ya ki ha ki ar bynta, heiwa chibhah u lai ki lyngba ka Zojila Pass katwa chi bhah won u lai ki lyngba ka Rohtang Pass heiwa ki luti wow lai ki u man ko 1400 Km wa 1700 Km.
I thmu yong kani ka Rally toh wow wanrah yei mynsien maya ri deiwa pynkynmoo paidbah leh ya ki chipai kiwa da e yei mynsien yong ki neibynta ka ri.
