Ki MDC ka Liang Pyrchah hapoh ka Khasi Hills Autonomous District Council (KHADC) da mih ki blap napoh ka dorbar mang tangka hadien wa ka Executive Committee yong ka Voice of the People Party (VPP) da pyneh ko wym pynbait ya ka mang tangka wa pura deiwa wanrah ya ka Supplementary Expenditure yong u snem 2024-25 kawa yatoh wa i su neibynta kiwa kreh wa da chah thung kaam pura kiwa da ujor cha ka Meghalaya High Court.
Chwa wow mih napoh ka dorbar, uwa yahkhmat ka Liang Pyrchah, u Titosstarwell Chyne da ong u wa kammon ha ki le bnai ka EC da Sanction ko wow tipmit ya kiwa kreh katwa ha ka mang tangka wa pura kattæ ym tipmit ki.
Da kylli u wa ha ka Rule wa kammon wa da pynpsiah ya kani ka Supplementary Expenditure 2024-25. Wei neiliang ka Liang Pyrchah da pynsñiaw ko wym ye u pdiang yei e daw ka Executive Committee wa ha ki 3 bnai ym pu em wa batai bniah.
Neiliang u Executive Member ka chnat muna tangka, u Seiborlang Warbah da ong u wym em Rule wow khang ya ka EC u wanrah ya kani ka Supplementary Expenditure wei ha ki 3 bnai ka EC ym pu em wa batai bniah wei hadien wa da yachong da chem wa em ki kreh kiwa khlem Sanction wa thung kreh.
Hawa pynsñiaw wa ka Liang Pyrchah ym kwah ko ya kani ka mang tangka, u Titos da ong u wa ki MDC ym ye ki wow pdiang ya kani ka mang tangka kawa man pyrchah aiñ.
Neiliang u Chairman, u Strong Kharjana da rai u wow lai chakhmat wa ka mang tangka, heiwa da phah yieñ ya ki MDC kiwa kwah wa ki wym kwah wow wanrah noh ya ka mang tangka kamwa da tyrwa da ka Executive Committee, wei hawa ñiaw khlieh bru, ka VPP kawa em hei boon paaid da jop ko wei da tyrwa ya ka mang tangka khlem ki MDC ka Liang Pyrchah, yeiwa uwa yahkhmat ka Liang Pyrchah da ong u toh deiwa leh dei bor.
Discussion about this post