Ki MLA ka Congress kiwa em ha ka Liang Pyrchah, ynne ka sngi wa soo yong ka Dorbar Synrai, da mih ki napoh ka Yung Dorbar wow pyrchah yei wym yohlaad wow yatai ya ka ‘Short Duration Discussion’ wa da wanrah da u Chief Whip ka Liang Pyrchah, u Process T Sawkmie hajrong i dawa wow beh kreh chipor ya ki heh pulit wa emkti hei yap uwa yahkhmat warim ka HNLC, u Cherish Starfield Thangkhiew.
Neiliang u MLA ka Mawlai, u PT Sawkmie da pynsñiaw u yei wym yahaap yei pyntip wa da phah na ka yung krehkaam u Lamphang wa i yatai wa da booh wow yaklam ynne ka sngi da hap pyndam noh, neibhah wa dang em i hapyrdi i takit.
I pyndam noh da u Lamphang ya i yatai hajrong kani ka phang hapoh ka Dorbar ynne ka sngi toh wa hadien wa ka sorkar da phah ko dei thoh katkam i e yumut yong u Advocate General neidaw wa ini toh iwa dang em hapyrdi i takit.
Neiliang ki MLA ka Congress nadooh u Dr. Mukul Sangma, u HM Shangpliang wa u George B Lyngdoh da yieñ ki wow kyntu ya u Lamphang, u Metbah Lyngdoh wow e laad u yatai ha ki kattu katni bynta ki wym haap hapoh ka takit namo ki wym man Sub Judice ki wym ktah ya ka takit, heiwa da ong ki wa i dawa behkreh ya ki pulit ym toh iwa man Sub Judice, neibhah wa man ka phang wa emkaam wa i sur ki paidbah da dawa ki.
Ki MLA ka Congress hadien wa mih ki na ka Dorbar da kbai pyrchah ki leh ya ka sorkar wa ya u Montri Rangbah.
