Kiwa chong chnong ka Jarain kawa em hapoh ka Amlarem Sub-Division, ynne i step da mih paidbah ki wow pynsñiaw yei pyrchah joor ya u Dolloi ka Elaka Amwi u Jemewell Pyrtuh hajrong i thmu wow wai baing yaka yaw Jarain ynne ka sngi kamjooh yei thung u Dolloi ya u Acting Waheh Chnong ka Jarain.
Neiliang kiwa pyrchah da ong ki wa u Dolloi da leh u ya ini waroh khlem da pyntip chwa, khlem da yaklam chwa waka chnong, kamtæ da mih wow pyrcha yeini i leh yabor u Dolloi.
Yow pyn jai jai ya ini i yakhih da wan ka SDO ka Amlarem ka J Kharpuri kawa da wan wow pynsñiawthooh paidbah wa ym chah wow pynman ya kam kini ki yakhih paidbah ha kam kini ki por neidaw wa em ka khlam heiwa neiliang kiwa pyrchah leh da kohngooh ki deiwa ong u yang chwa yaka kaiphot kawa daw e da ka JHADC.
Da pynkrehkaam leh daka Section-144 CRPC ha kani ka thaw wei ki paidbah da liwan ki cha yung.
Neiliang u Dolloi da ong u wa waroh iwa da leh u toh deiwa da dep phah kot dep pyntip chwa cha ka District Council.
Neiliang won kiwa chong chnong da ong ki wa da dep ki leh wow thoh cha ka JHADC wow pynsñiaw yei pyrchah yaki rai wa da chim u Dolloi khamtam yei thung Acting Waheh Chnong ya u Ami Tariang ha chnong Jarain.
Puræ leh: Pynbaad kiwa chong chnong ka Jarain wa thombor u Dolloi ka Elaka Amwi yei hok yong ki
