Ka Khasi Students’ Union War Jaiñtia Circle deilang waka Hynniewtrep National Youth Front Southern Ri War Circle ynne ka sngi heipor 8 waje i step da lai ki cha Land Customs Station, Tamabil, Dawki kawa man kawi na ki kad khayi pateiñ ha ka thaaiñ War Jaiñtia yow pyrchah joor hajrong i khreh wai ka sorkar ya kani ka thaw khayi, wei i pyrchah toh hajrong i ku smat kiwa yoh u COVID-19 wei wow khanglaad yei yoh psiah uni u khñiang cha ka thaaiñ War Jaiñtia.
Hadein wa sdang i pyrchah, da wan wow synran lang wei wow pyrchah sa ki Waheh Chnong wa ki Secretary chnong yong ki chnong waphær waphær yong ka thaaiñ War Jaiñtia, ka FKJGP War Circle wei kamjooh leh ka HYF War Jaiñtia Circle da wan lang ki cha kani ka thaw.
Neiliang u Extra Assistant Commissioner u Jonathan Shylla uwa em ha kani ka thaw da pyn jai jai wei da yaklam u wow pynsñiawthooh yumut.
Neiliang ki seiñbhalang deilang wa ki Waheh Chnong wa kiwa yahkhmat chnong waphær waphær da chim ki ka wi ka rai wa ka sorkar næ ka yung krehkaam yong u Deputy Commissioner wa toh u khut ko ya waroh kiwa yahkhmat chnong deilang wa ki seiñbhalang wow yaklam yatai sani bha hajrong kani ka kaam khayi pateiñ neibhah lada wai kulmar daw booh ko hei eh ya kiwa chong chnong yong ka War Jaiñtia wei kiyi wow bahkhlieh ya ini lada uni u khñiang COVID-19 u poi u ha ki chnong khappood.
Hawa yaklam wa u EAC da ong wei da kular u wa daw pynsñiaw u ya ini cha ki bor wa haneiñ wei yaka bui (Report) ya iwa jia heini leh daw e u myntu ka sngi wei ynne ka sngi wa mynstep ka sngi ym pu wai ya kani ka thaw khayi neidaw wa ki bor District leh ym pu dep ki yei kamram wa toh u leh ki.
Neiliang kiwa yahkhmat chnong da pynsñiaw ki hakhmat u EAC wa ynne dang wan kiwa yahkhmat chnong wei ym pu mih ya mih paidbah tangwa lada ka sorkar ym khut yaklam ko wei lada lai chakhmat ym yohsa wow pynbna chnong yow ya mih paidbah hanlada tyngkheiñ yaki kyndon (Protocol) yong ka sorkar.
