Mih kiwa thoh khubor na Secretariat neidaw wa slem u sdang ka Cabinet Meeting

by Wyrta Staff

May 25, 2017

Reading Time: 2 mins read

Shillong: Neidaw wym burom u Dr. Mukul Sangma, Montri Rangbah ka jylla wa ka dhab ki montri ya ka por, ynne ka janmiet da pynbor ya kiwa thoh khubor kiwa em ha Shillong wow mih noh ki khlem yang de yeiwa mih na ka yalang (Cabinet Meeting) ka Sorkar MUA-II.

Hei yong sakhiat ka Cabinet Meeting da booh por wow sdang noh ko heipor 4:30 janmiet, tangwa da sdang ko hadooh i por 6:15 wei hadien wa da yang kiwa thoh khubor palat chi kynta, ka Cabinet Meeting ym pu kut ko iwa da pynman ya kiwa thoh khubor wow dam noh ki u yang hadooh wa kut.

Ini i leh yong u Dr. Mukul ym toh ka sien wa nyngkong wei da jia i man i por hadooh ki yalang paidbah heiwa da pynyang u ya ki paidbah da ki kynta.

I daw wa mih kiwa thoh khubor na Secretariat ymtoh wa ym kwah ki u pyntip paidbah ya ka rai ka Cabinet Meeting toh neidaw ki haap ki u beh por yow pyndep yei kaam yong ki.