U Avner M Pariat uwa man kam u kyrtong MLA ka VPP na East Shillong da phah u yaka chithi wow ieh noh yei man dkhot ka Party wei heijooh i por VPP lyngba ka State Executive Party da chim ko yaka rai wow beh seiñ noh ya oo deiwa ong wa klam u pyrchah yaka Party lyngba ki rynsan Social Media i wym yahaap de kam u dkhot ka State Executive Committee.
Neiliang u Avner ha ka chithi mih seiñ da ong u wa da leh u yeini deiwa pyrkhat yillu bha.
Da ong u wa nyngkong da psiah u chapoh ka VPP deiwa ngait wa yieñ ko neibynta wow wanrah yei kylla wa bha iwa da emkaam bha katni tangwa kat dang lai ki por ka Party da lai ko cha ka luti wym em de yatoh kamwa sdang.
Da ong u leh wa ka Party da lai ko cha ka luti chongchit niam iwa da eh bha ya oo hanla man u leh kam uwa wan na ka yung wa chakri ya ka Balang Presbyterian.
Nyngkong da ong u wa i kular toh u man kam ka Party wa lai chakhmat tangwa katni won da man ko kawa lai chadien deiwa chongchit niam i wym chah de yei pyrkhat pyrdaiñ u wow kyrchaan ka.
Chooh chooh da ong u wa boon kiwa kyrchaan da ong ki ya oo wow suki hi-eh ymtoh wow klam u neibhah da em laad bha u wow jop kam u MDC tangwa ym chah i mynsien u wow arsap wei da bha wow mih noh napoh ka Party katni wa ku ko bar hei por wa hiar ko.
Da ong u leh wa u chong-ngiah noh u na ki kaam Politics hapoh ka jylla iwa katni da man du wow phiah bru wei u pteiñ u man u bru samen u wow klam laitlooid yeiwa sñiaw u cha ki paidbah wei ym psiah u cha kawon kawon ka Party ha kini ki por wei ym klam u leh ya iwa da tip u wei iwa da klam hapoh ki yachem lang ka Party.
Ha kini ki por wa em u hapoh ka Party da yoh u tip chiboon wei da yachem u wa kiwa boon ki bru kiwa da chemphang kiwa da pynman ya oo u sñiawngooh u.
Discussion about this post