U JA Lyngdoh ynne ka sngi da phah u ya ka chithi cha u President ka BJP Meghalaya yow mih noh chisyndon napoh ka Party hadien wa man u kam u dkhot la soo snem chiteiñ neidaw wa booh ka party ya oo cha rood, wym em burom ya oo kamjooh wa chah kyntait u hapoh ka Party ym du chisien arsien tangwa na iwi i por cha iwi.
U JA Lyngdoh uwa da psiah chapoh ka Party nadooh u snem 2016 da ong u wa da kreh chitom u yow pynku ya ka Party hadooh wow taan ya ki MLA yow psiah cha ka chwa ka Election 2018 heiwa da psiah u Sanbor Shullai, u AL Hek, u Robinus Syngkon wa u Justine Dkhar tangwa iwa da jia ini wadep da pynman ya oo wow mih noh napoh ka Party.
Da ong u leh wa hapoh i yahkhmat u Ernest Mawrie kam u President ka Party da sñiaw chah chet kylla heiwa da jied u ya u Rocky Hek kam u kyrtong naka North Shillong hadien wa rem u (JA Lyngdoh) wei da pyrchang u wow yachem wa u Ernest tangwa ym em mankaam.
Tangwa hadien wa mih noh u Rocky Hek napoh ka Party ini wa dep, da pyrchang biang u JA Lyngdoh wow yachem wa u Ernest Mawrie tangwa ym em biang mankaam.
Iwa da pynsñiawsih chooh chooh ya u JA Lyngdoh toh wa hanla da kreh chitom u ya ka Party da pynbna pathan yei pyrtuid u Martamlin Pyrbot kam u kyrtong ka North Shillong wei ya kani ka 17th North Mandal Committee wa da seiñ da oo hi leh da pyndam ya ka wei da khang leh ya u Sanbor Shullai wow wan cha yung u.
Tangwa da e khublei u ya u President warim ka BJP, u Shibun Lyngdoh uwa da pynyoo yei chaniah wow yieñ yow yaklam wa kiwa yahkhmat ka Party ha Delhi neibynta ki Christan hadien wa pynbna ya ka Good Governance wa Digital Day ha ka sngi Christmas hadooh wa kyrriah ya ka tarik deiwa pynyinsur yei por chi tayaw wow leh burom ya kini ki sngi wei kamjooh yow klam pyrchah yei khang baam doh masi wa kiwi kiwi de.
U JA Lyngdoh toh uwa jooh man kam u MLA kamjooh u Montri sorkar wei da yakhun Election u na ka North Shillong ha u 2018.
