Mih paidbah ka Mynthong wow kynmoo lyngkhooh snem wa ar ka Swachh Bharat

Jowai : Ka Mynthong Local Dorbar Jowai, chirup i krehlang wa ka Jowai Municipal Board ynne ka 15 tarik u Naichiphaw da kynmoo warom ki yei dap 2 snem ka Swaach Bharat Mission deiwa mih paidbah ki wow pynkhooid ya ka dong ka chnat.

Ha kani ka sngi ki khon khynroo khyllood ka dong nadooh ki manbei manpa hei yahkhmat kiwa heh ka dorbar, dangstep da mih paidbah ki u yow pynkhooid ya ki kdong ki chmiang ki luti syngkieñ ka chnong ka chnat yow man ka chnong kawa khooid wei yoosuk u pait kamjooh u wanrah ko yei chait i khiah ya kiwa chong chnong.

Hadien wa da dep i pynkhooid da em ka yalang tbian heiwa u Waheh Chnong u ma M. Lamare da ong u wa yeini i pynkhooid dong ha kani ka sngi da leh kam chibynta i kynmoo warom yei dap 2 snem ka Swachh Bharat Mission hajrong ka phang “Massive cleanliness drive & celebration”, neibhah i kwah ka sorkar u wanrah i khooid i jngiar hapoh chnong poh thaw man iwa emkaam bha wa e i leh i chait i khiah iwa kordor tam hei rta u bru.

Da yaroh u ya ka sorkar wada yoo jngai ko yei emkaam i khooid i jngiar wei neiliang ka dong lyngba ki seiñ khynroo khyllood da rai ki leh u pynkhooid dong chisien chibnai khnang wa ki bru chim kabu u sarom ki u noh taroi ya ki jhep khamtam hei bynta ka District Library wa chisien da em prokram ki sarok da dap jhep bait ki.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Kamtæ da kyntu u leh ya ki paidbah u yakrehlang ki neibynta i khooid i jngiar deiwa leh khooid liang wa nang nadooh i doh, i pran, i thij pyrkhat, ki yung ki sem kamjooh ha ka imlang sahlang.

Ki arngut ki waheh u ma A. Laloo wa u ma M. Bareh hei klam yong ki da ong ki, kamwa da yoo ka sorkar nadooh na Delhi da yaleh ki u wanrah i khooid deiwa pynlut daki hajar klur nadooh i e yarap pynyoh paikhana kut thlu yung cha ki paidbah yow lait ki u lai paikhana taroi nalor kiwi ki jait yarap, da yoh i nuksa na u Prime Minister ka ri u Narendra Modi kamjooh u Lat ka Jylla yong i wa kwah ki u wanrah i khooid deiwa mih pynkhooid ki yei thaw paidbah kamtæ toh u bood ya ka nongmuna yong ki.

Da ong leh wa i leh khooid toh i kaamram yong waroh ym du kiwa heh, emkaam leh ki khynnah u man ki kiwa da yoh sikai nadooh dang khian.