Kat dang mih ki sngi ka khlam COVID-19 dang pteiñ ko wei iwi na ki laad wow yada na i poor ka khlam toh i tika namo Vaccine heiwa ka sorkar da thooh ko ki laad heiwa kammon wow pynchlur ya ki paidbah wow wan ki chaphrang wow chim ya ini i tika yada na uni u khñiang khlam.
Ki bor District da sdang ki leh ya ka Extensive Vaccination Campaign heiwa du hapoh ka West Jaiñtia Hills da booh hadooh 64 tylli ki thaw wow e tika ha ki thaw sumaar kam ki CHC, PHC, UPHC, Sub Centre wa kiwi kiwi.
Ki bor chnong leh embynta bha ki wow pynchlur ya ki paidbah wow chim tika ki heiwa ynne ka sngi da sakhi wa ha Yung Club ka Loompyrdi Mihmyntdu nadooh i step hadooh chiteiñ sngi da em palat 150 ngut kiwa da wan, wei ki bru leh dang pteiñ ki wow wan chaphrang wow chim ya ini i tika heiwa ha ka 18 tarik hawa e tika ha Loompyrtuh, Mihmyntdu da wan hadooh palat 150 ngut kiwa chim tika ha ka chi sngi.
Ini i wan ki bru ynne ka sngi da man i palat yeiwa da mang (Capacity) iwa man 100 sien (Dose).
Hawa yaklam wa u Waheh Chnong ka Mihmyntdu, u Abul Phawa da ong u wa hadien wa pyntip ki Doctor ka Nangbah PHC, nadooh ka 18 tarik da pynbna paidbah lyngba ki tanghæng, wei ha kini ki ar sngi da wan chim yei tika da kiwa boon ngut ki paidbah heiwa ha ka 18 tarik da wan palat 150 ngut wei ynne leh da poi ki palat 150 ngut.
Da ong u leh wa neiliang ka chnong da kyrpaad ko ya ki paidbah wow wan chaphrang neibhah kam ha ini i por wa emkaam yei chait i khiah, neiliang ki Committee ka chnong leh da yaleh ki u pyntip cha kiwa 18 hadooh 44 snem wow wan chaphrang khlem em iwon iwon i pynbor khlem booh ya i artatien neibhah wa i chait i khiah toh iwa kongsan tam.
Neiliang u Dawanheipor Shylla uwa man u Asst. Waheh Chnong ka Mihmyntdu da ong u wa ha ini i por wa dadep da em i duna ki dawai tangwa katni i dawai da man i iwa dap wei ini da man i kyrkhu ya ki paidbah.
Da yooluti u leh wa i wan boon ki bru wow chim tika pynyoo i yei sñiawthooh ki bru wei ini da man i leh i dur wa jop ya ka chnong deiwa yooluti wa myntu hadooh wa kut i e tika daw wan bait palat 200 ngut ki bru.
Da kyntu u leh ya kiwi ki chnong wow bood ya kani ka nongmuna wa da yah ka Mihmyntdu wow pynsñiawthooh ya ki bru khlem pynbor neibhah wa da sakhi wa ki bru wa wan cha kani ka thaw e tika ym em de thooh næ pait ki ya kiwa pynlai chnong tangwa mar poi heini da thooh bait ki ya i thaw e tika.
