Ynne ka sngi ki paidbah na ki soo tylli ki chnong wa em ha khappood wa ka Bangladesh ha East Jaiñtia chirup wa u MLA ka Sutnga, u Shitlang Pale; ki MDC ka JHADC u Emlang Lamare wa u Dr. Sankey Shangpung uwa man leh u Chairman ka Council da mih ki wow lai paidbah na Dieñchynrum chadooh ka yung krehkaam u Deputy Commissioner ka District ha Khliehriat wow pynyoo ya i dak wow pyrchah ya ka sorkar jylla kawa ym mano wow chna noh ya uni u sarok Rymbai-Bataw-Borkhat-Sonapur Road wa cha kini ki chnong.
Ya ini i lai paidbah da khut pynman da ka Joint Action Committee (JAC) wa kynthup ya ka Dorbar Chnong Lejri, Lahalein, Huroi wa Hingaria wei ki paidbah na kini ki chnong da mih ki chirup wa ki kot-rben namo ki Placard wa thoh ya ki kyntien wow beiñ ya ka sorkar jylla wa ka sorkar pyrdi kawa ym mano de wow chna ya u sarok cha kini ki chnong hadooh kini ki sngi.
Ha ki Placard da thoh ya ki kyntien wa ong wa ha kini ki chnong ym em sarok, ym em bordiñ wei ym em Mobile Network, da sy’ad i bai kit bar ya ki mar wa rep ki, hap lai kjat ki 4-5 kynta wow thied chi kilo u khoo wei ym thap Vote ki lada ym yoh sarok najrong kiwi kiwi.
Manda poi ha yung krehkaam u Deputy Commissioner da em ka yalang wa tbian wa pynlai da u Kynjaimon Amse uwa man kam u Convener ka Committee.
Neiliang u Golden Marbaniang, u Waheh Chnong ka Huroi hawa e yei klam da ong u wa mar poi i ly’ur da hap lai ki dei kjat wow pyndep yei kaam yong ki wei ini i leh ka sorkar da ieh khonswet sakhiat ko ya ki paidbah kini ki chnong iwa da pynbor ya ki wow mih paidbah ki kamni ynne ka sngi.
U Waheh Chnong ka Lahalein U Lamsing Tynsong da khana u ya ka parom uni u sarok ya uwa da chna heipor u MLA warim ka Rymbai u Nihon Ksih uwa da wanrah ha ka GREF wow chna ya u sarok ha khappood wei du manda yoo ka sorkar jylla ya ka poisa hei kaam chna sarok da knieh noh ko na ka GREF wei katni da sahteiñ bait uni u sarok.
Da ong u leh wa lada hadooh kini ki sngi dang neh ka East Pakistan tæ uni u sarok ym ieh ya oo kamni deiwa kdaw leh ya ki kaam wa embynta ki paidbah ka chnong wa ka thaaiñ heipor ka Thma Bangla kiwa man kam kiwa chah kuli.
Neiliang u Shitlang Pale da ong u wa kam ki paidbah em ki ka hok wow dawa ya u sarok wei oo ha ki le snem wa dadep nadooh wa man MLA u da yachem wei da yaklam u wa u montri ka chnat PWD, u Prestone Tynsong hajrong uni u sarok wei ha kini ki sngi wa dadep leh da yaklam biang u ya u Tynsong wow ban joor biang yeini.
Da ong u leh wa sñiawsih u hawa neipor cheipor chah klam u ha ki bru hajrong ini i kaam wei iwa phylla toh wa ka poisa wa toh u chna ya uni u sarok katni da rah noh cha West Khasi Hills.
U Emlang Lamare da ong u wa man i doohnong wa khroo ya ki paidbah kiwa hap wow kit ya ki mar yong ki du neidaw wa ym em sarok wei ini i leh ka sorkar da pynbor ko ya ki paidbah ka thaaiñ wow pyrkhat wow psiah noh chapoh Bangladesh.
Neiliang u Dr. Sankey Shangpung da ong u wa ka sorkar ymtoh u pyrkhat ko wow chna sarok du ha sor tangwa da toh i por wow kyruiñ ko leh cha kam kini ki thaaiñ kiwa da chah iehbeiñ bha.
Da ong u leh wa neipor cheipor jooh yachem u wa ki sahep ka PWD hajrong ini i bynta deiwa pynrap leh wa lada kam uwa mihkhmat paidbah ymye u wow leh tang kajiak neibynta ki paidbah ymtoh de wow chah ki wow psiah u chapoh ki chnong ki thaw yong ki.
U Kynjaimon Amse hawa e i klam da kyntu u ya ka sorkar wow ieh noh ya ka sor Shillong wei wow wan chna noh ya u sarok ha Huroi Hingaria neibhah cha sor du hadien ar minit wa sih sarok ha ka minit wa le da wan wot ka PWD wow chna sarok.
Da pynche u leh wa ym em iwon iwon i thmu wow psiah cha Bangladesh wei ini wadep da ong kamtæ toh du wow pynsñiaw donhi ya ka sorkar yei emkaam ki paidbah ka thaaiñ.
Kiwi ki waheh chnong wa ki seiñbhalang kiwa da klam da beiñ joor ki ya ka sorkar deiwa kdaw ya i eh i khoo wa yachem ki paidbah ka thaaiñ deiwa maham leh wa lada ym mano ko sorkar yei dawa yong ki, cha Secretariat toh u lai paidbah wow dawa yei hok yong ki.
