Ka Dorbar Chnong Rangad, East Jaiñtia Hills District, ryngkat i ya ksohkti lang ka Pdeiñ Rangad, ka Umbyrleiñ Falls Eco-Tourism Society waka Rangad Village Health Council (VHC) kam chibynta wow lehkmen ya ka Gandhi Jayanti ha uni u snem 2023, da pynman ki yei pynkhooid chnong ha waroh ki 4 tylli ko dong yong ka chnong.
Da sdang yei pynkhooid chnong heipor 8:00 waje i step na madanbol ka Rangad, deiwa yoh yei klam na u Damon Lamo kam u waheh chnong hajrong i lehkmen yaka sngi Gandhi Jayanti wei kamjooh leh i emkaam wow leh khooid leh pliah ha yung ha sem, ha chnong ha thaw khamtam hei doh i pran yong i manbru.
Kiwa chong chnong nadooh u Waheh Chnong, Secretary Chnong, ki Executive Member ka chnong, kiwa kitkaam ka Pdeiñ Rangad, ka Umbyrleiñ Fall Eco-tourism Society, kiwa kitkaam ka VHC, ki manbei manpa, ki khynroo khyllood hadooh ki khynnah leh kamjooh da ya mih ki u chimbynta lang ryngkat ki wait ki wakhu, ki saro wa ki tin pynlang jhep yow pynkhooid yaka chnong waroh kawi.
Discussion about this post