Jowai : Ha iwi i jia ha ka 26 tarik u Kmaichonglad u snem 2016 iwa dang heini wa mih pyrthai wei da sdang i u poor cha ka Facebook wa WhatsApp uwi u bru wa tip kam u Jiten Boruah na Assam da kynnoh wa chah khrong poisa yabor ki na ki 4-5 ki khynnah khynroo kiwa da paan hadooh T. 10,000 khlem iyi iyi i daw.
Katkam ka Facbook Post wa da booh ha ka Facebook page wa tip kam ka ‘Dawki’ da ong u wa hadien wa mih liwan ki na Dawki da em ka wi ka Maruti Car 800, rong lieh wa boodien wei kawa em kamwa 5 ngut ki bru hapoh kiwa phah pynsangeh ya ka kari yong ki.
Hadien wa poi ha iwi i thaw wa rap boon bru da chim pass ki ka, ka kari u Jiten wei da pynsangeh ki ka kani kari.
Heini i por da kylli ya kini ki wa pynsangeh yei daw wa kdong ya ki wei da jubab ki wa haap su ki T. 2000 kam ka khajna bai lai luti ki. Napoh ka kari kini kiwa kdong da em uwi wa ong wa da ye ki u lai wei u Jiten da yohlaad u wow lai.
Hadien ini da wan kdong biang ki ya ka kari u Jiten wei da pynsangeh biang ki ya oo wei da paan poisa ki T. 10,000 neidaw wa yah kynthai ki kamtæ u yah ya ki cha Police Station.
U Jiten da ong u ka kynthai toh ka kurim yong oo wa ki ar ngut ki lok chynrang yong oo. Kini ki lok chynrang yong oo da jan chah dat ki lada ym su poisa ki.
Yow lait na i mynsoo da su ki T. 2,000 wei da yoh ki u liwan khlem chah pynwit de.
Ka Dawki/Shnongpdeng toh kiwa da pawnaam bha katni heiwa da boon ki bar jylla wa wan hiar ke cha ki tangwa lada em kam ini i jia, ki kaam uiñsawari daw man ki iwa sepai ha chwa wow yoh ki tre chnong i myntoi na ka.
Discussion about this post