Mih pyrtuit arngut ki malik napoh ri-loom Jaiñtia kiwa murieh poisa cha baar-ri

Jowai : Ha uni snem da pynmih pyrthai ya ki pyrtuid ki actor, ki actress wa ki bru wa pawnaam kylleiñ ka pyrthai ha kawa da tip kam ka “Panama Papers“ kawa da yoh da ka kot khubor napoh Germany kawa tip ka “Süddeutsche Zeitung”.

Kani ka kot khubor da yoh ko ya kani ka yutip na ki bru wa ym tip, wei deilang wa ka the International Consortium of Investigative Journalists (ICIJ) da pait da sylli bniah ya kini ki kot ki sla kiwa em hadooh 11.5 Million tylli.

Ha kini ki kot ki sla da mih ki pyrtuid kiwa booh ya ka poisa yong ki cha ki company wa em cha ki ri, ki chnong yow lait ki u su dan (tax) deiwa kyrriah ya ka poisa yong ki na ki ri wa em ki cha kini ki company (offshore entities) wa em cha kini ki ri.

Da leh ya ini i bichaar bniah ya kini ki kot ki sla da ka ICIJ kattu la chi snem wei ha Naitung (April) 3 tarik uni u snem da pynmih pyrthai ya ki.

Related posts

Khut ka UDP-West Jaiñtia Hills ya kiwa kwah u yaleh MDC cha ka JHADC

November 25, 2024

Da boonsien dep u yasyllok wa kiwa chongdai madan, phylla u Paul yei pynbaad wa leh yabor

November 24, 2024

Ha kini ki kot ki sla da mih ki pyrtuid ki arngut na Jaiñtia Hills ya kiwa da tip pyrtuid kam u Philip Pala wa u Lesly Shylla.

Ya u Lesly Shylla da mih pyrtuid u ha ka company wa tip kam ka ETERNAL ENTERPRISES GLOBAL INC kawa em ha British Virgin Islands kawa yatoh waka ri Cyprus wei da man u kam u Shareholder nadooh 11 Naisaphra (August) 2008 wei da booh u leh ya i thawsah (address) u ha ka chnong Latyrke, East Jaiñtia Hills.

Ya u Philip Pala won da mih i pyrtuid u ha ka company wa tip kam ka AZURE ENTERPRISES GLOBAL INC kawa em ha ka British Virgin Islands kawa yatoh wa ka ri Cyprus.

Yow pynkhih ya ka poisa yong kini ki arngut napoh India cha bar ri da leh da ka company wa tip kam ka Mossack Fonseca ka wa krehkaam leh ha British Virgin Islands wei da em 100,000 tylli ki company hapoh yong ka.

Ha kini ki artylli ki company da mih leh ki pyrtuid kiwi na Shillong kam u Earce Clifford Kharsyntiew, Bokstar Kurkalang wa u Kenneth Fletcher Rangad.

Kini ki arngut na ri-loom Jaiñtia da mih pyrtuid ki leh kam ki director ka Cosmos Wahiajer Narpuh Cements Private Limited, Directors ka Sutnga Cements Limited, Directors ka Mai Hotels Limited wa ki Directors ka CMJ Realtors & Developers Private Limited.

Ini toh iwa dang sdang don hi ki pyrtuid yong ki bru na Meghalaya u mih ha kani ka Panama Papers wei ye u mih chooh chooh ha kini ki sngi wa daw wan.